ICC Tournaments Window 2028 To 2035 India Hosting Champions Trophy 2029 ODI World Cup 2031 : आंतरराष्ट्रीय क्रिकेट परिषदेने (ICC) रविवारी २०३५ पर्यंत होणाऱ्या सर्व प्रमुख पुरुष क्रिकेट स्पर्धांच्या आयोजन कालावधीला (विंडो) अधिकृत मंजुरी दिली आहे. या नव्या वेळापत्रकानुसार भारतीय क्रिकेट चाहत्यांसाठी मोठी आनंदाची बातमी असून, भारत ९ ते २८ ऑक्टोबर २०२९ दरम्यान चॅम्पियन्स ट्रॉफीचे एकट्याने यजमानपद भूषवणार आहे, तर ९ ऑक्टोबर ते २३ नोव्हेंबर २०३१ दरम्यान बांगलादेशच्या साथीने एकदिवसीय विश्वचषकाचे संयुक्त यजमानपद पार पाडणार आहे.

२०२८ पासून टी-२० आणि एकदिवसीय विश्वचषकांची रंगणार मेजवानी –

आयसीसीचे मुख्य कार्यकारी अधिकारी संजोग गुप्ता यांनी सांगितले की, खेळाडू आणि सदस्य देशांना दीर्घकालीन नियोजन करता यावे यासाठी हे वेळापत्रक आगाऊ जाहीर केले आहे. यानुसार २०२८ चा टी-२० विश्वचषक १२ ऑक्टोबर ते १२ नोव्हेंबर दरम्यान ऑस्ट्रेलिया आणि न्यूझीलंडमध्ये होईल, तर २०३० चा टी-२० विश्वचषक इंग्लंड, स्कॉटलंड आणि आयर्लंडमध्ये खेळवला जाईल. याशिवाय २०३२ आणि २०३४ मध्ये टी-२० विश्वचषक, तर २०३५ मध्ये एकदिवसीय विश्वचषक आयोजित केला जाईल; ज्यांच्या यजमान देशांची घोषणा अद्याप बाकी आहे.

जागतिक कसोटी अजिंक्यपद स्पर्धेचे अंतिम सामने जून महिन्यात –

A long-term calendar takes shape as the ICC announces major men’s tournament windows through 2035.

More ➡️ https://t.co/MQ3C04Rp1t https://t.co/ZwsOK1eDqt

— ICC (@ICC) November 15, 2026

विश्व टेस्ट चॅम्पियनशिपचे (WTC) अंतिम सामने २०३५ पर्यंत दर दोन वर्षांनी जून महिन्यात पार पडतील. यातील २०२९ आणि २०३१ च्या फायनलचे यजमानपद इंग्लंडकडेच राहणार असून, २०३३ आणि २०३५ च्या ठिकाणांची घोषणा नंतर केली जाईल.

हेही वाचा – England Beats Australia : ॲडलेडमध्ये इंग्लंडचा ऐतिहासिक पलटवार! ऑस्ट्रेलियाचा १३५ धावांनी धुव्वा उडवत मालिकेत १-१ अशी बरोबरी

१२८ वर्षांनंतर ऑलिम्पिक क्रिकेट पात्रता फेरीच्या तारखा जाहीर –

तब्बल १२८ वर्षांच्या प्रदीर्घ प्रतीक्षेनंतर लॉस एंजेलिस ऑलिम्पिक २०२८ मध्ये क्रिकेटचे पुनरागमन होत आहे. यासाठी पुरुष पात्रता सामने ५ ते १३ फेब्रुवारी २०२८ दरम्यान बांगलादेशात, तर महिला पात्रता सामने २६ फेब्रुवारी ते ५ मार्च २०२८ दरम्यान अमेरिकेत खेळवले जातील.