IAS Success Story : करिअरची दिशा कुठे वळवायची याचा निर्णय बहुतेक तरुणांना वयाच्या २०-२२ व्या वर्षीही स्पष्ट नसतो. पण आस्था सिंह यांच्यासाठी हा वयाचा टप्पा निर्णायक ठरला. केवळ २१ वर्षांच्या वयात त्यांनी UPSC सारखी देशातील सर्वात कठीण स्पर्धा परीक्षा पास करून IAS अधिकारी बनण्याचं स्वप्न साकार केलं.

कोण आहेत आस्था सिंह?

आस्था सिंह या पंजाबच्या जीरकपूर येथील रहिवासी असून, त्यांचं बालपण भोपाळ आणि पंचकुला येथे गेलं. त्यांनी दिल्ली विद्यापीठातील श्रीराम कॉलेज ऑफ कॉमर्स येथून इकोनॉमिक्समध्ये पदवी (BA) पूर्ण केली. अभ्यासात लहानपणापासूनच हुशार असलेल्या आस्थाने १२वी नंतरच UPSC करायचं ठरवलं होतं.

अभ्यास, चिकाटी आणि शिस्त : यशाचं त्रिसूत्र

कोरोना काळात कॉलेज ऑनलाईन होतं. पण आस्थाने या काळाचा सकारात्मक उपयोग करत UPSC च्या तयारीला सुरुवात केली. विशेष बाब म्हणजे तिने कोणतेही कोचिंग क्लासेस न घेता, स्वतःच्या अभ्यासावर विश्वास ठेवत हे यश मिळवलं. यासाठी ती दररोज नियोजनबद्ध अभ्यास करत होती. तिच्या मेहनतीचं फलित म्हणजे UPSC 2024 मध्ये मिळवलेली 61वी रँक.

आधीच HCS परीक्षा पास, ट्रेनिंगही सुरू

UPSC आधीही आस्था सिंहने यश मिळवलं होतं. तिने हरियाणा लोकसेवा आयोगाच्या HCS परीक्षेत यश मिळवून असिस्टंट एक्साइज अँड टॅक्सेशन ऑफिसर म्हणून ट्रेनिंग सुरू केली होती. मात्र, UPSCमध्ये मिळालेलं यश तिच्या कारकिर्दीला नवा आयाम देणारे ठरले.

देशभरातून कौतुक

आस्था सिंहच्या यशानंतर तिचं सर्वत्र कौतुक होत आहे. अनेक विद्यार्थ्यांसाठी ती आज प्रेरणास्थान ठरत आहे. कोणताही क्लास न लावता, नेटका अभ्यास आणि जिद्द यातूनही UPSC जिंकता येऊ शकतो हे आस्थाने सिद्ध केलं आहे.