Shweta Singh Kirti : दिवंगत अभिनेता सुशांत सिंह राजपूतची बहीण श्वेता सिंह कीर्तीने रक्षाबंधनाच्या निमित्ताने आपल्या भावाच्या आठवणींना उजाळा दिला आहे. तिने इन्स्टाग्रामवरुन एक भावनिक पोस्ट  शेअर केली आहे. या पोस्टमध्ये तिने सुशांतसोबतचे बालपणीचे काही खास फोटो शेअर केले आहेत.

लहानपणी ती आपली आवडती खेळणी सुशांतसोबत आनंदाने वाटून घ्यायची. बाहुली असो किंवा तिला भेट म्हणून मिळालेला छोटा किचन सेट, सुशांत त्या खेळण्यांसोबत खेळताना दिसला की तिला खूप आनंद व्हायचा. मात्र, मिठाईच्या बाबतीत दोघांमध्ये वेगळीच मजा असायची. दोघांनाही मिठाई खूप आवडत असल्याने सुशांत आणि स्वतःला समान वाटा मिळेल याची श्वेता विशेष काळजी घ्यायची, अशी आठवण तिने पोस्टमध्ये सांगितली आहे.

पोस्टमधील एका जुन्या फोटोमध्ये श्वेता सुशांतला मिठाई भरवताना दिसत आहे. या फोटोची आठवण सांगताना ती म्हणते, सुशांतला अगदी अर्धाच वाटा मिळावा यासाठी ती किती काळजी घ्यायची. त्याने मोठा घास घेऊ नये, याकडेही ती लक्ष ठेवायची, अशी गोड आठवण तिने सांगितली.

 

View this post on Instagram

 

A post shared by ♾️Shweta Singh Kirti (@shwetasinghkirti)

या आठवणी आपल्यासाठी अत्यंत अनमोल असल्याचे सांगत श्वेता भावुक झाली. तिने आपल्या भावाला उद्देशून म्हटले की, पुढच्या जन्मात त्याने तिच्या मोठ्या आणि गोड बहिणीची भूमिका साकारावी आणि ती त्याच्यासारखीच खोडकर व गोड मुलगी व्हावी. आयुष्यातील एखादा क्षण कायमचा जपून ठेवता आला असता, तर तो त्यांच्या संपूर्ण कुटुंबासोबतचा हा सुंदर क्षण असता. एका फोटोमध्ये कायमचे एकत्र राहिल्याची भावना व्यक्त करत तिने सुशांतला रक्षाबंधनाच्या शुभेच्छा दिल्या.

सुशांत सिंह राजपूतच्या निधनाला ६ वर्षे पूर्ण

बॅालिवूड अभिनेता सुशांत सिंह राजपूतचे १४ जून २०२० रोजी वयाच्या ३४ व्या वर्षी निधन झाले. मुंबईतील वांद्रे येथील त्याच्या राहत्या घरी तो मृतावस्थेत आढळला होता. त्याच्या निधनानंतर देशभरात मोठी चर्चा झाली होती आणि चाहत्यांना या घटनेने मोठा धक्का बसला होता. आजही त्याचे चाहते आणि कुटुंबीय त्याच्या आठवणी जपत आहेत.

Nepal Floods : नेपाळमध्ये मृतांचा आकडा वाढला! महाराष्ट्रातील ११४ नागरिक अडकले; अहवालातून भीषण संकटाचा मोठा इशारा