Prakash Mahajan – बीडमधील गुन्हेगारी तसेच शस्त्राचे प्रदर्शन करत ज्या काही गोष्टी समोर येत आहेत. या सगळ्या घटना पाहता आता महाराष्ट्र नवनिर्माण सेनेचे नेते प्रकाश महाजन यांनी मोठा निर्णय घेतला आहे. प्रकाश महाजन यांनी त्यांच्या जवळील असलेली बंदूक शासनाला परत करण्याचा निर्णय घेतला आहे. तसेच निवडणूक काळात शासनाकडे जमा केलेली बंदूक आता परत घेणार नसल्याचे देखील त्यांनी जाहीर केले आहे. प्रकाश महाजन म्हणाले, खरंतर शेतामध्ये राहत असताना श्वापदापासून संरक्षण व्हावे म्हणून ही बंदूक मी घेतली होती. आता माझे वय 72 वर्ष आहे, त्याचा मला तसाही काही उपयोग राहिला नाही. म्हणून ही बंदूक मी आता शासनाकडे जमा करणार आहे. अंजली दमानिया यांनी ज्या गोष्टी सांगितल्या म्हणून मला असे वाटत आहे की मी माझा शस्त्र परवाना शासनाला परत करायच्या मन:स्थितीत आहे. ज्यांच्याकडे शस्त्र आहेत त्यांनी त्याचे इतके वंगाळवाने प्रदर्शन केले आहे की आपल्याकडे शस्त्र आहे हे सांगायला आता लाज वाटत आहे. लोकांना धमकावण्यासाठि शस्त्र दिली आहेत का? असा सवाल देखील त्यांनी उपस्थित केला. ते म्हणाले, मी आज बीडला आहे, छत्रपती संभाजीनगरला जाऊन मी माझे शस्त्र आणि परवाना पोलिस कमिशनर यांना देणार आहे. फक्त एक विनंती करतो की शासनाने त्या शास्त्राला योग्य भावात विकत घ्यावे आणि त्यातून येणाऱ्या दोन पैशांचा मला उपयोग व्हावा एवढी विनंती मी करतो. पुढे बोलताना प्रकाश महाजन म्हणाले, 23 तारखेला मी मुख्यमंत्री देवेंद्र फडणवीस यांची भेट घेतली. मी बरेच वर्ष बीड जिल्ह्यात राहिलो आहे. मी येथील परिस्थिति त्यांना सांगितली आणि सक्षम पोलिस अधिकारी जिल्ह्यात देण्यात यावा अशी मी त्यांना विनंती केली आहे. बीड जिल्ह्यातील वाळू माफिया यांच्यावर खिळ बसली तर निश्चित या गुन्हेगारीला आळा बसेल. दरम्यान, सामाजिक कार्यकर्त्या अंजली दमानिया यांनी बीड जिल्ह्यातील शस्त्र परवानाधारकांबाबत ट्विट करत सवाल उपस्थित केले होते. परभणीत 32 आणि अमरावती ग्रामीणमध्ये 243 परवाने असताना एकट्या बीडमध्ये 1,222 शस्त्र परवानाधारक का? असा सवाल विचारत दमानियांनी एक व्हिडीओ पोस्ट केला होता. अंजनी दमानियांनी शेअर केलेल्या हवेत गोळीबार करणाऱ्या एका तरुणाचा व्हिडीओ शेअर केला होता. वाल्मिक कराडच्या नावावर परवाना असताना, विनापरवाना कैलास फड आणि निखील फड बंदूक कशी चालवतात? असेही दमानिया यांनी म्हटले. दमानिया यांच्या ट्वीट नंतर पोलिसांनी कैलास फड याला अटक केली होती. त्यानंतर फड याला न्यायालयात हजर केले असता त्याला 1 दिवसाची पोलीस कोठडी सुनावण्यात आली होती. मात्र, आज त्याला 50 हजारांच्या जातमुचलक्यावर जामीन मंजूर करण्यात आला आहे. मात्र, दमानिया यांनी ट्वीट केल्यानंतर बीडमध्ये पोलिसांनी कारवाईला सुरुवात केल्याचे पाहायला मिळाले होते.
