हिंगोली : राज्यातील महायुती सरकारमध्ये मंत्रिमंडळात खांदेपालट आणि काही मंत्र्यांच्या राजीनाम्याची चर्चा राजकीय वर्तुळात जोर धरत आहे. यासंदर्भात शिवसेना उबाठा गटाचे खासदार संजय राऊत यांनी ‘सामना’तून धक्कादायक खुलासे केल्याने राजकीय वातावरण तापले आहे. दरम्यान, कृषिमंत्री माणिकराव कोकाटे यांच्या वादग्रस्त वक्तव्यांमुळे त्यांच्याकडून कृषी खाते काढून घेतले जाण्याची आणि राजीनामा देण्याची शक्यता वर्तवली जात आहे. यावर हिंगोलीतील कळमनुरीचे शिवसेना आमदार संतोष बांगर यांनी कोकाटे यांचे जोरदार समर्थन करत त्यांना सर्वात चांगला मंत्री ठरवले आहे. शिवाय, स्वत:ला आरोग्य मंत्रिपदाची संधी मिळावी, अशी इच्छा बांगर यांनी व्यक्त केली. कोकाटेंवरील आरोपांचे खंडन – माणिकराव कोकाटे यांच्यावर रमी खेळण्याचा आरोप करणारा व्हिडिओ क्रॉप केलेला असून, तो खोटा आहे, असे बांगर यांनी सांगितले. “आजकाल कोणीही काहीही क्रॉप करून व्हिडिओ बनवत आहे. माणिकराव कोकाटे हे सर्वोत्तम काम करणारे मंत्री आहेत. त्यांच्यावरचे आरोप निराधार आहेत,” असे बांगर यांनी माध्यमाशी बोलताना स्पष्ट केले. कोकाटे यांचे काम चांगल्या पद्धतीने सुरू असल्याचेही त्यांनी नमूद केले. कावड यात्रा आणि निवडणूक तयारी – श्रावण मासारंभानिमित्त 4 ऑगस्ट रोजी संतोष बांगर यांच्या नेतृत्वाखाली कावड यात्रा आयोजित करण्यात येणार आहे. यावेळी शिवसेनेचे नेते व मुख्यमंत्री एकनाथ शिंदे यांच्यासह प्रमुख नेते उपस्थित राहणार असल्याची माहिती बांगर यांनी दिली. स्थानिक स्वराज्य संस्थांच्या निवडणुकीच्या पार्श्वभूमीवर शिवसैनिक सज्ज असल्याचे त्यांनी सांगितले. “जिल्हा परिषद, पंचायत समिती आणि नगरपालिकांवर शिवसेनेचा भगवा ध्वज फडकवू,” असा आत्मविश्वासही त्यांनी व्यक्त केला. आरोग्य मंत्रिपदाची इच्छा – मंत्रिमंडळ फेरबदलाबाबत विचारले असता, बांगर म्हणाले, “मी एक छोटा कार्यकर्ता आहे. मंत्रिमंडळातील बदलांबाबत मला माहिती नाही. पण पक्षाने संधी दिल्यास मंत्रिपद कुणाला नको असते? मी आमदार म्हणून प्रामाणिकपणे काम करतोय. जर मला मंत्रीपदाची जबाबदारी मिळाली, तर आरोग्य विभागात काम करून महाराष्ट्रातील जनतेला आदर्श मंत्रिपद कसे असते, हे दाखवेन.” राजकीय वर्तुळात चर्चेला उधाण – महायुती सरकारमधील मंत्रिमंडळ फेरबदल आणि राजीनाम्यांच्या चर्चेने राजकीय वातावरण ढवळून निघाले आहे. माणिकराव कोकाटे यांच्यावरील वादग्रस्त व्हिडिओच्या आरोपांमुळे त्यांच्या मंत्रिपदावर प्रश्नचिन्ह उपस्थित झाले आहे. मात्र, संतोष बांगर यांनी कोकाटे यांचे समर्थन करत त्यांना पाठिंबा दर्शवला आहे. येत्या काळात मंत्रिमंडळात नेमके काय बदल होणार, याकडे सर्वांचे लक्ष लागले आहे.
