Sameera Reddy : ‘बॉलिवूडपेक्षा दाक्षिणात्य चित्रपटसृष्टीत जास्त मान-सन्मान आणि पैसा मिळाला’; अभिनेत्री समीरा रेड्डी स्पष्टचं बोलली
Sameera Reddy : समीरा रेड्डीने २००० च्या दशकाच्या सुरुवातीला आपल्या अभिनय कारकिर्दीला सुरुवात केली. हिंदी चित्रपटांसोबतच तिने तमिळ, तेलुगू आणि मल्याळम चित्रपटांमध्येही काम केले.

Sameera Reddy : बॉलिवूड अभिनेत्री समीरा रेड्डी सध्या तिच्या एका वक्तव्यामुळे चर्चेत आली आहे. हिंदी चित्रपटसृष्टीपेक्षा दाक्षिणात्य चित्रपटसृष्टीत आपल्याला अधिक मान-सन्मान, पैसा आणि स्टारडम मिळाल्याचा खुलासा समीराने नुकत्याच दिलेल्या एका मुलाखतीत केला आहे.
समीरा रेड्डीने २००० च्या दशकाच्या सुरुवातीला आपल्या अभिनय कारकिर्दीला सुरुवात केली. हिंदी चित्रपटांसोबतच तिने तमिळ, तेलुगू आणि मल्याळम चित्रपटांमध्येही काम केले. विविध भाषांमधील चित्रपटांतून तिने स्वतःची वेगळी ओळख निर्माण केली. विशेषतः दाक्षिणात्य चित्रपटसृष्टीत तिला मोठी लोकप्रियता मिळाली.
मुलाखतीदरम्यान आपल्या अनुभवांबद्दल बोलताना समीरा म्हणाली, “मला दाक्षिणात्य चित्रपटसृष्टीत मिळालेला आदर, कलात्मक ओळख, पैसा आणि स्टारडम हे हिंदी चित्रपटसृष्टीच्या तुलनेत कितीतरी पटीने जास्त होते. आज जवळपास १८ वर्षांनंतरही दाक्षिणात्य प्रेक्षकांकडून मिळणारे प्रेम आणि आदर अतुलनीय आहे.”
पुढे बोलताना तिने बॉलिवूड आणि दाक्षिणात्य प्रेक्षकांमधील आपल्याला जाणवलेल्या फरकाचाही उल्लेख केला. बॉलिवूडमधील प्रेक्षक कदाचित आपल्याला एकेकाळी चित्रपटांत काम करणारी अभिनेत्री म्हणून ओळखतील; मात्र दाक्षिणात्य प्रेक्षक आजही ‘वारणम आयिरम’ (Vaaranam Aayiram) या चित्रपटातील मेघना या भूमिकेवरून आपली ओळख सांगतात, असे तिने म्हटले.
आजही चाहते भेटल्यावर आपल्यावरील प्रेम व्यक्त करतात आणि आपल्याला भरभरून प्रतिसाद देतात, असेही समीराने सांगितले. त्यामुळे आपण स्वतःला सर्वप्रथम दाक्षिणात्य अभिनेत्री मानत असल्याचे ती म्हणाली.
दरम्यान, समीराने काही काळासाठी अभिनय क्षेत्रातून ब्रेक घेतला होता. सध्या ती गोव्यात आपल्या कुटुंबासोबत आणि मुलांसोबत वेळ घालवत आहे. सोशल मीडियाच्या माध्यमातून ती चाहत्यांच्या संपर्कात असते. अभिनेता संजय दत्तची मुख्य भूमिकेत असलेल्या ‘आखिरी सवाल’ चित्रपटात समीरा झळकली होती.






