Pankaja Munde : मराठवाडा मुक्तिसंग्राम दिनानिमित्त छत्रपती संभाजीनगर दौऱ्यावर असताना माजी मुख्यमंत्री उद्धव ठाकरे यांनी दिवंगत भाजप नेते गोपीनाथ मुंडे यांच्या मृत्यूचा मुद्दा उपस्थित केला होता. मुंडे यांचा मृत्यू ‘रहस्यमय’ असल्याचे वक्तव्य उद्धव ठाकरे यांनी केले होते. त्यांच्या या वक्तव्यावर आता मंत्री आणि गोपीनाथ मुंडे यांच्या कन्या पंकजा मुंडे यांनी प्रतिक्रिया दिली आहे.

गोपीनाथ मुंडे यांच्या मृत्यूबाबत माझ्या मनात कोणताही संशय नाही. मात्र, उद्धव ठाकरे यांच्याकडे यासंदर्भात काही अधिकची माहिती असेल, तर त्यांनी ती स्पष्ट करावी, असे पंकजा मुंडे यांनी म्हटले आहे.

उद्धव ठाकरे नेमकं काय म्हणाले?

१७ सप्टेंबर रोजी छत्रपती संभाजीनगर येथे झालेल्या कार्यक्रमात उद्धव ठाकरे यांनी प्रमोद महाजन आणि गोपीनाथ मुंडे यांच्या राजकीय योगदानाचा उल्लेख केला. यावेळी त्यांनी गोपीनाथ मुंडे यांच्या मृत्यूबाबत भाष्य करत तो रहस्यमय असल्याचे म्हटले.

मुंडे यांना मंत्री म्हणून लोकसभेत काम करण्याची संधीही मिळाली नाही, अशी खंतही त्यांनी व्यक्त केली. उद्धव ठाकरे यांच्या या वक्तव्यानंतर गोपीनाथ मुंडे यांच्या मृत्यूबाबत राजकीय वर्तुळात पुन्हा चर्चा सुरू झाली.

‘बाबांचं जाणं आजही तेवढंच वेदनादायी’

उद्धव ठाकरे यांच्या वक्तव्यावर प्रतिक्रिया देताना पंकजा मुंडे यांनी गोपीनाथ मुंडे यांच्या निधनाच्या आठवणी आजही वेदनादायी असल्याचे सांगितले. २०१४ मध्ये दिल्लीतील रस्ते अपघातात गोपीनाथ मुंडे यांचे निधन झाले होते.

पंकजा मुंडे म्हणाल्या की, उद्धव ठाकरे यांना या मृत्यूमागे काही रहस्य असल्याचे वाटत असेल किंवा त्यांच्याकडे यासंदर्भात अधिक माहिती असेल, तर त्यांनी ती समोर आणावी.

‘मी स्वतः सीबीआय चौकशीची मागणी केली होती’

गोपीनाथ मुंडे यांच्या निधनानंतर मुलगी म्हणून आपण त्यांच्या मृत्यूची सीबीआय चौकशी व्हावी, अशी मागणी केली होती, असेही पंकजा मुंडे यांनी सांगितले. त्यावेळी राजनाथ सिंह हे केंद्रीय गृहमंत्री होते आणि पंतप्रधान नरेंद्र मोदी यांनीही या विषयाकडे लक्ष दिल्याचे त्यांनी नमूद केले.

Deepanshu Shokeen : अनवाणी पायांनी प्रचार, 30 हजारांहून अधिक मतं; अपक्ष उमेदवाराचा दणदणीत विजय! कोण आहेत 21 वर्षीय दीपांशू शौकीन?