Rashmika Mandana : ‘मला एका भाषेत अडकून राहायचं नाही’; वाढत्या ट्रोलिंगवर रश्मिका मंदाना स्पष्टच बोलली!
Rashmika Mandana : रश्मिका मंदाना हिने आपल्या वैयक्तिक आणि व्यावसायिक आयुष्याबद्दल मनमोकळेपणाने संवाद साधला.
Rashmika Mandana : दाक्षिणात्य अभिनेत्री रश्मिका मंदाना हिने आपल्या अभिनयाच्या जोरावर मनोरंजनविश्वात स्वतःची वेगळी ओळख निर्माण केली आहे. दाक्षिणात्य चित्रपटांसोबतच तिने हिंदी चित्रपटसृष्टीतही लक्ष वेधक भूमिका साकारल्या आहेत. ‘ॲनिमल’, ‘छावा’, ‘गुडबाय’ आणि ‘मिशन मजनू’ यांसारख्या चित्रपटांमधून ती प्रेक्षकांच्या भेटीला आली. मात्र, हिंदी चित्रपटांमधील तिच्या बोलण्याच्या शैलीवरून आणि उच्चारांवरून तिला अनेकदा सोशल मीडियावर ट्रोलिंगचा सामना करावा लागला. आता याच मुद्द्यावर रश्मिकाने मौन सोडले असून आपली भूमिका व्यक्त केली आहे.
उच्चारांवरून होणाऱ्या ट्रोलिंगवर रश्मिका काय म्हणाली?
रश्मिका मंदाना हिने आपल्या वैयक्तिक आणि व्यावसायिक आयुष्याबद्दल मनमोकळेपणाने संवाद साधला. नुकत्याच दिलेल्या एका मुलाखतीत तिने स्पष्ट केले की, चित्रपटसृष्टीत काम करण्यास सुरुवात केल्यापासून तिला वेगवेगळ्या कारणांमुळे टीकेचा सामना करावा लागला. कधी तिच्या अभिनयावरून, तर कधी भाषेवरून आणि उच्चारांवरून तिला लक्ष्य करण्यात आले. मात्र, या टीकेमुळे तिने स्वतःच्या करिअरवर मर्यादा घालण्याचा निर्णय घेतला नाही.
Vijay Deverakonda-Rashmika Mandana together
रश्मिकाच्या मते, तिला कोणत्याही एका चित्रपटसृष्टीपुरते किंवा एका भाषेपुरते मर्यादित राहायचे नव्हते. तिला वेगवेगळ्या भाषांमध्ये काम करायचे असून विविध प्रकारच्या भूमिका साकारायच्या आहेत. टीका होत असली, तरी नव्या संधी स्वीकारण्याचा निर्धार कायम असल्याचे रश्मिका म्हणाली.
‘ॲनिमल’पासून ‘द गर्लफ्रेंड’पर्यंत; वेगवेगळ्या भूमिका साकारण्याचा आनंद
रश्मिकाने आपल्या करिअरच्या सुरुवातीपासूनच वेगवेगळ्या धाटणीच्या चित्रपटांमध्ये काम करण्यावर भर दिला. एकाच प्रकारच्या भूमिकांमध्ये अडकून न पडता विविध व्यक्तिरेखा साकारण्याची तिची इच्छा आहे. ‘ॲनिमल’ आणि ‘द गर्लफ्रेंड’ यांसारख्या एकमेकांपेक्षा वेगळ्या कथानकांच्या चित्रपटांचा भाग होता आल्याचा तिला आनंद आहे.
बिकिनी आणि अंगप्रदर्शनाबाबत रश्मिकाची स्पष्ट भूमिका
रश्मिकाने चित्रपटांमध्ये बिकिनी परिधान करण्याबाबत आणि अंगप्रदर्शनाच्या दृश्यांबाबतही आपली भूमिका मांडली. काही भूमिका किंवा प्रसंगांसाठी विशिष्ट प्रकारचे कपडे परिधान करण्याची गरज असू शकते, हे तिला मान्य आहे. मात्र, स्वतःला ज्या गोष्टींमध्ये सहजता वाटत नाही, त्याबाबत ती स्पष्टपणे आपली भूमिका मांडते.
अंगप्रदर्शन करणारे कपडे परिधान करणे आपल्याला नेहमीच सोयीचे वाटत नाही, असे रश्मिकाने सांगितले. त्यामुळे चित्रपट स्वीकारताना ती स्वतःच्या पसंतीनुसार काही मर्यादा ठरवते. याबाबत ती दिग्दर्शक आणि निर्मात्यांशी संवाद साधते. दरम्यान, रश्मिका मंदाना सध्या ‘रणबली’ या चित्रपटामुळे चर्चेत आहे. या चित्रपटात तिने अभिनेता आणि पती विजय देवराकोंडासोबत स्क्रिन शेअर केली आहे.
