पुणे : चारचाकीसाठी माहेरहून पैसे आणण्याचा तगादा लावण्यासह तिच्या चारित्र्यावर संशय घेऊन तिचा शारिरीक आणि मानसिक छळ करून आत्महत्येस प्रवृत्त करणाऱ्या पतीस सात वर्षे तर सासू, सासऱ्यांना एक वर्ष सक्तमजुरीची शिक्षा न्यायालयाने सुनावली. पती अतुल ठोंबरे, सासू सुषमा ठोंबरे आणि सासरा हनुमंत ठोंबरे (रा. माऊली कृपा बिल्डींग, लेन नं 6, कर्वेनगर) अशी शिक्षा झालेल्यांची नावे आहेत. याखेरीज, पतीस दोन हजार रुपये तर सासू, सासऱ्यांना प्रत्येकी एक हजार रुपयांचा दंड न्यायालयाने सुनावला. दंड न भरल्यास अतिरिक्त कारावास भोगावा लागेल, असेही निकालात नमूद करण्यात आले आहे. हि घटना 7 नोव्हेंबर 2011 रोजी सकाळी पावणे अकराच्या सुमारास घडली. याप्रकरणात पोलिसांनी पतीसह सासू, सासऱ्यांविरोधात न्यायालयात दोषारोपपत्र दाखल केले. सरकार पक्षातर्फे सरकारी वकील प्रदीप गेहलोत यांनी बाजू मांडली. त्यांनी सहा साक्षीदार तपासले. यामध्ये, फिर्यादी व त्यांच्या घरातील अन्य व्यक्तींची साक्ष महत्वाची ठरली. ॲड. गेहलोत यांनी आरोपींना कठोरात कठोर शिक्षा करण्याची मागणी केली. न्यायालयाने सरकार पक्षासह बचावपक्षाचा युक्तिवाद ऐकून घेत शिक्षा सुनावली.
