सोलापूर : जिल्ह्यातील मोहोळ तालुक्यात पूर्ववैमनस्यातून पती-पत्नीवर गोळीबार केल्याची धक्कादायक घटना समोर आली आहे. ही घटना मोहोळ तालुक्यातील रोपळे येवती मार्गावर ८ एप्रिल रोजी दुपारी १२ वाजण्याच्या सुमारास घडली आहे. या प्रकरणी दशरथ केरू गायकवाड या व्यक्तीच्या विरोधात मोहोळ पोलिस ठाण्यात गुन्हा दाखल करण्यात आला असून आरोपी अद्याप फरार आहे. शिवाजी पुंडलिक जाधव (वय ६५) आणि त्यांची पत्नी सुरेखा शिवाजी जाधव अशी गोळीबारात जखमी झालेल्यांची नावे आहेत. शिवाजी जाधव यांना एक गोळी तर सुरेखा जाधव यांना तीन गोळ्या लागल्याचा प्राथमिक माहिती मिळत आहे. महिलेवरती रूग्णालयात उपचार सुरू आहेत, त्यांची प्रकृती चिंताजनक आहे. याबाबत मोहोळ पोलिसांनी दिलेल्या माहितीनुसार, येवती येथील शिवाजी जाधव व त्यांच्या पत्नी सुरेखा असे दोघे मिळून पंढरपूर येथे चैत्रीवारीनिमित्त दर्शनासाठी गेले होते. देवदर्शन करून दुपारी १२ वाजण्याच्या सुमारास रोपळे मार्गे दुचाकीवरून येवतीकडे येत असताना, त्यांच्याच गावातील दशरथ केरू गायकवाड याने जुन्या भांडणाच्या रागातून पिस्तुलातून जाधव पती-पत्नीवर गोळ्या झाडल्या. त्यांना जीवे ठार मारण्याचा प्रयत्न केला. गायकवाड याने केलेल्या राऊंड फायरमध्ये सुरेखा जाधव या गंभीर जखमी झाल्या. तसेच शिवाजी जाधव हे पण जखमी झाले. घटनेनंतर तत्काळ ग्रामस्थांनी त्यांना पंढरपूर येथील खासगी रुग्णालयात उपचारासाठी दाखल केले. या घटनेची माहिती मिळताच पोलिसांनी घटनास्थळी धाव घेतली. पोलिसांच्या पथकाने घटनास्थळाची पाहणी करत फायर झालेले व फायर न झालेले राऊंड मॅक्झिन जप्त केले. दरम्यान, घटनास्थळी स्थानिक गुन्हे शाखा, ठसे तज्ज्ञ, श्वानपथकाला पाचारण करण्यात आले होते. घटनेनंतर संशयित आरोपी दशरथ गायकवाड फरार झाला आहे. त्याच्या तपासासाठी दोन पथके रवाना करण्यात आल्याची माहिती पोलिस निरीक्षक हेमंत शेडगे यांनी दिली. घटनेचा अधिक तपास मोहोळ पोलिसांकडून सुरू आहे. वृद्ध मजुरावर ब्लेडने वार कमी जास्त मजुरीवर काम करण्याच्या किरकोळ कारणावरून एका ६५ वर्षीय वृद्ध कामगारावर एकाने ब्लेडने हल्ला केल्याची घटना घडली. या हल्ल्यात वृद्धाच्या उजव्या गालावर गंभीर जखम झाली आहे. आरोपीने मारहाण करून जीवे मारण्याची धमकी देत घटनास्थळावरून पळ काढला. हितेश कांबळे असे ब्लेडने मारून जखमी केल्याप्रकरणी गुन्हा दाखल करण्यात आलेल्याचे नाव आहे. भुजगराव गोपाळ सोनवणे (वय ६५, रा. मांडेगाव, ता. बार्शी) असे जखमी वृद्धाचे नाव आहे. घटनेदिवशी ते मांडेगाव येथून बार्शी येथे कामाच्या शोधात आले होते. डॉ. बाबासाहेब आंबेडकर शॉपिंग सेंटर जवळील कामगार चौक येथे ठेकेदार तात्या कोळी यांनी त्यांना एका तासाचे काम देऊ केले. यावेळी तिथेच उभा असलेला हितेश कांबळे याने इतक्या कमी मजुरीत काम का करतोस? असे म्हणत शिवीगाळ केली व खिशातून ब्लेड काढून सोनवणे यांच्या उजव्या गालावर वार केला.
