How To Handle Tantrums: लहान मुले अनेकदा रागाच्या भरात टॅन्ट्रम्स दाखवतात. कधी मॉलमध्ये जमिनीवर आडवी पडतात, तर कधी लोकांसमोर मोठ्याने रडतात किंवा ओरडतात. अशा वेळी पालकांचीही चिडचिड होते. मात्र बालरोगतज्ज्ञांच्या यांच्या मते, मुलांचा राग योग्य पद्धतीने हाताळणं खूप महत्त्वाचं आहे. डॉक्टर सांगतात की मुलं मुद्दाम टॅन्ट्रम्स करत नाहीत. बहुतेक वेळा मुलं झोपाळू असतात, चिडचिडलेली असतात, तणावात असतात किंवा भुकेली असतात, तेव्हा असा राग व्यक्त करतात. जर त्यांची गरज वेळेवर ओळखून पूर्ण केली, तर टॅन्ट्रम्स टाळता येऊ शकतात. मुलांचा राग कसा नियंत्रित करावा? मुलं रागावली असताना त्यांना मारणं, ओरडणं किंवा शिक्षा करणं टाळावं. त्याऐवजी संयम ठेवून मुलाला समजून घ्यावं. त्या क्षणी लॉजिक समजावण्यापेक्षा आधी मुलाला शांत करणं जास्त गरजेचं असतं. मुलाला प्रेमाने जवळ घ्या, मिठी मारा आणि त्याच्यावर माया करा. यामुळे मुलं लवकर शांत होतात. मुलाला आवडणारं गाणं लावणं किंवा त्यांचं लक्ष दुसरीकडे वळवणंही उपयोगी ठरू शकतं. मुलगा किंवा मुलगी शांत झाल्यावर त्याचं कौतुक करा. पालकांनी हे लक्षात ठेवणं गरजेचं आहे की मुलं त्यांच्या भावना नीट व्यक्त करू शकत नाहीत. म्हणूनच ती रडून, ओरडून किंवा राग दाखवून आपलं म्हणणं सांगतात. हा कोणताही बहाणा नसून त्यांच्या भावनांची अभिव्यक्ती असते. थोडक्यात, संयम, प्रेम आणि समजूतदारपणा ठेवला तर मुलांचा राग आणि टॅन्ट्रम्स सहज हाताळता येऊ शकतात.
