Priya Berde post : ज्येष्ठ अभिनेत्री संध्या शांताराम यांचं वृद्धपकाळाने मुंबईतील राजकमल स्टुडिओत निधन झालं. त्यांनी वयाच्या ९४ व्या अखेरचा श्वास घेतला. त्या चित्रपती व्ही शांताराम यांच्या पत्नी होत्या. १९९१ मध्ये पतीच्या निधनानंतर त्या स्टुडिओच्या परिसरात वास्तव्यास होत्या.

ज्येष्ठ अभिनेत्री संध्या शांताराम यांना पिंजरा या सिनेमाने मोठी प्रसिद्ध मिळवून दिली. या सिनेमातील त्यांच्या अभिनयाबरोबरच नृत्याचंही प्रेक्षकांनी भरभरून कौतुक केलं. त्यांनी ६० वर्षांच्या सिनेकार्यकीर्दीत मोजकीच अवघे १४ सिनेमे केले. त्यांच्या निधनानंतर आता एका मराठी अभिनेत्रीने सोशल मीडियाच्या माध्यमातून भावूक पोस्ट शेअर केली आहे. या पोस्टमधून संध्या शांताराम यांच्या आठवणींना उजाळा दिला आहे. त्या अभिनेत्रीचं नाव आहे, प्रिया बेर्डे.

अभिनेत्री प्रिया बेर्डें यांची पोस्ट 

“संध्या बाई गेल्या, खरंतर नात्यानं त्या माझ्या आज्जी लागतात.. लहानपणापासून मी त्यांची जबरदस्त फॅन होते आणि आहे, त्यांच नृत्य, त्यांचे कॉस्च्युम्स, त्यांचं मेकअप सगळं सगळं मला खूप आवडायचं, चंदनाची चोळी अंग अंग जाळी मधलं माझ्या डोळ्यात कचरा गेला ह्या गाण्यावर मी नाच करून दाखवायची, हातात कपबशीची चवड लावून पण त्यांचं एक गाणं होतं ते पण मी करायची आणि घरातल्या कपबश्या फोडल्यात आणि आईचे फटके खाल्लेत, कागदाचे कपटे उडवून घरभर केले होते तेव्हा आई झाडू घेऊन माझ्या मागे लागल्याचं आठवतंय, फक्त आधा है चंद्रमा मी काही करू शकले नाही नाहीतर आईने माझं डोकंच फोडलं असतं, माझं डान्स च्या बाबतीतलं खरं इन्स्पिरेशन संध्या बाईच होत्या केवढा जबरदस्त पगडा होता त्यांचा माझ्या मनावर..”असं पोस्टमध्ये प्रिया यांनी म्हटलं आहे.

संध्या शांताराम यांची भेट अन् कौतुक 

“त्यांची माझी भेट शेम टू शेम च्या डबिंग च्या वेळी झाली होती, त्या फिल्म मध्ये एक पॅरीडी सॉंग होतं त्यात संध्या बाईंची मी थोडी नक्कल केली होती, त्या नाचताना फार मान हलवायच्या ते मी केलं होतं आणि बाई गाणं पहायला आल्या मला अक्षरशः घाम फुटला होता. एकतर मी त्यांची जबरदस्त फॅन आणि त्यात मी अशी केलेली नक्कल.. कसं असतं ती नक्कल चेष्टा वाटू नये एवढीच अपेक्षा होती, पण समोरची व्यक्ती ते बघून नक्की काय विचार करेल हे माहीत नव्हतं.. पण त्यांना जर ते आवडलं नाही तर मी त्यांचे पाय धरून माफी मागायची ही तयारी ठेवली होती, पण त्यांनी माझं खूप कौतुक केलं. आजच्या काळातली तू उत्तम नर्तिका आहेस ह्या शब्दात कौतुक केलं, काय भारी वाटलं होतं मला.. त्यानंतर त्यांना भेटायचा खूप प्रयत्न केला पण भेट होऊ शकली नाही, त्या कुणालाही भेटत नाहीत असं सांगण्यात आलं.”

त्यांचा आशिर्वाद मिळाल्याची भावना 

“त्यावेळी राजकमल स्टुडिओत शांताराम बापूंनी त्यांच्या सगळ्या चित्रपटातल्या फर्निचरचं, कॉस्च्युमचं आणि दागिन्यांचं खूप मोठं म्युझियम केलं होतं ते मी आवर्जून पाहायला गेले होते, काय अप्रतिम होते.. अगदी “स्त्री” या चित्रपटापासून ते “चंदनाची चोळी”.. पर्यंतच्या गोष्टी तिथे होत्या, एवढेच काय मी “अशी ही बनवाबनवी” च्या “हृदयी वसंत फुलताना” या गाण्यातली साडी सुद्धा संध्या बाईंनी चंदनाची चोळी अंग अंग जाळी या चित्रपटात वापरलेलीच घातली आहे. मला त्यावेळी ते किती अप्रूप होतं, त्यांचा आशीर्वादच मिळाल्याची भावना होती.”

 

View this post on Instagram

 

A post shared by Prreeya Berde (@prreeyaberde)

कुबड्या घेऊन नृत्याचं शूट पूर्ण केलं

“अत्यंत मेहनती व मनस्वी कलाकार जल बिन मछली नृत्य बिन बिजलीच्या वेळी त्यांचा एका छोट्या प्लॅटफॉर्म वरून कुबड्या घेऊन डान्स होता, पण नाचताना अंदाज चुकला आणि बाई डायरेक्ट खाली.. गुढगे फुटले 6 महिने अंथरूण धरलं, knee replacement  झाली, डॉक्टरांनी नाचायला मनाई केली, पण बाईंनी कुणाचंही न ऐकता शेव खऱ्या अर्थाने कुबड्या घेऊन नृत्याचं शूट पूर्ण केलं.”

एक पर्व संपलं .. भूतकाळ कसा सरसर डोळ्या समोरून गेला..

आज्जी तुला भावपूर्ण श्रद्धांजली

अशी भावनिक पोस्ट अभिनेत्री प्रिया बेर्डे यांनी त्यांच्या इंन्स्टाग्रामवरून केली आहे.

हेही वाचा : अभिनेत्री रिधिमा पंडितचे मराठीत चित्रपटात पदार्पण; ललितसोबत साकारणार भूमिका