Honda QC3 : होंडाने भारतात QC3 ही नवी इलेक्ट्रिक स्कूटर लॉन्च केली आहे. त्याची एक्स-शोरूम किंमत 1.35 लाख रुपये आहे. या स्कूटरमध्ये 3kWh क्षमतेची बॅटरी असून, कंपनीने 145 किमीपर्यंतची IDC रेंज दिली आहे. विशेष म्हणजे सीटखाली 32 लिटरची स्टोरेज जागा आणि 5 इंचांचा TFT डिस्प्ले मिळतो.

Honda QC3 मध्ये स्वॅपेबल बॅटरीऐवजी फिक्स्ड बॅटरी देण्यात आली आहे. कंपनीने सुरुवातीला ही स्कूटर दिल्ली, आग्रा, कटक, सुरत आणि कोल्लम या पाच शहरांमध्ये उपलब्ध केली आहे. पुढील काळात इतर शहरांमध्येही विक्री सुरू केली जाणार आहे. स्कूटरची बुकिंग 5 हजार रुपयांत Hondaच्या वेबसाइटवर आणि निवडक RedWing डीलरशिपवर सुरू झाली आहे.

कंपनीच्या माहितीनुसार, QC3 ची बॅटरी 0 ते 80 टक्के चार्ज होण्यासाठी सुमारे 2 तास 40 मिनिटे, तर पूर्ण चार्ज होण्यासाठी सुमारे 4 तास लागतात.

QC3 मध्ये स्मार्ट की, 5 इंचांचा TFT डिस्प्ले, Honda RoadSync कनेक्टिव्हिटी आणि टर्न-बाय-टर्न नेव्हिगेशन मिळते. ही स्कूटर चार रंगांमध्ये उपलब्ध आहे. बाजारात त्याची स्पर्धा TVS iQube, Bajaj Chetak आणि Ather Rizta यांसारख्या इलेक्ट्रिक स्कूटरशी होणार आहे.

इलेक्ट्रिक स्कूटर घेताना केवळ कंपनीने सांगितलेली रेंज न पाहता प्रत्यक्ष वापरातील रेंज, चार्जिंग सुविधा, स्टोरेज, उपलब्धता आणि ऑन-रोड किंमत यांचाही विचार करणे महत्त्वाचे आहे.