पालघर : पालघर जिल्ह्यात डहाणूमध्ये भरधाव कारने पादचाऱ्यांना चिरडल्याची  दुर्घटना घडली आहे. गाडी चालवणारा पोलीस अधिकारी असल्याचे सांगण्यात येत आहे. चिंचणी ते डहाणू प्रवास करताना चालकाने बाजूने चालत असलेल्या पती-पत्नीला धडक दिली. अपघातानंतर चालक फरार झाला अशी माहिती पोलीस उपअधीक्षकांनी दिली. ही गाडी सहाय्यक पोलीस निरीक्षक सुहास खारमाटे यांच्या नावावर आहे.

डहाणू पोलीस ठाण्याच्या सहाय्यक पोलीस निरीक्षक सुहास खारमाटे यांच्या विरोधात वाणगाव पोलीस ठाण्यात गुन्हा दाखल करण्यात आला आहे. तारापूर ते डहाणू पोलीस ठाण्यापर्यंत भरधाव गाडी चालवून अपघात करून काहींना जखमी केल्याची घटना समोर आली आहे. त्यातील एकाची प्रकृती ही चिंताजनक असल्याने त्या व्यक्तीला नानावटी रुग्णालयात हलवण्यात आले आहे.

या गाडीने एका बाईकस्वाराला जोरदार धडक दिल्यानंतर चक्क तीन चाकांवर कार जवळपास 18 किलोमीटर पर्यंत भरधाव चालवत डहाणू पोलीस ठाण्याच्या आवारात पार्क केली. यानंतर कार चालक भिंतीवरून पळून गेल्याचे सांगितले जात आहे. ही कार डहाणू पोलीस ठाण्याचे सहाय्यक पोलीस निरीक्षक सुहास खारमाटे यांच्या नावावर आहे. या कार मध्ये पोलीस हॅट कॅप सुद्धा आढळून आली आहे.

ही अपघाताची घटना वाणगाव पोलीस ठाण्याच्या हद्दीत घडली आहे. सुहास खरमाटे हे अजूनही फरार असल्याचे बोलले जात आहे. सहाय्यक पोलीस निरीक्षक असलेल्या सुहास खारमाटे यांच्या विरोधात वाणगाव पोलीस ठाण्यात गुन्हा दाखल करण्यात आला आहे. विशेष म्हणजे या गाडीमध्ये पोलिसांची टोपी असल्याने एकच खळबळ उडाली आहे.

घटनेनंतर डहाणू पोलीस ठाण्याच्या बाहेर मोठी गर्दी जमली होती तसेच तणावाचे वातावरण निर्माण झाले होते. सदरचे अधिकारी नशेमध्ये गाडी चालवत असल्याचे बोलले जात असून तीन चाकांवरच गाडी चालवत असल्याचे DYSP यांनी सांगितले.