इंदापूर : काटी-लाखेवाडी जिल्हा परिषद गटात राष्ट्रवादी काँग्रेसने दणदणीत विजय मिळवत आपले वर्चस्व अधिक भक्कम केले आहे. राष्ट्रवादी काँग्रेसचे उमेदवार श्रीमंत पोपट ढोले यांनी तब्बल १३ हजारांहून अधिक मताधिक्याने या गटात ऐतिहासिक विजय नोंदवला. या निकालामुळे पुणे जिल्हा परिषदेत पक्षाची ताकद पुन्हा एकदा अधोरेखित झाली आहे. ही निवडणूक राज्याच्या उपमुख्यमंत्री सुनेत्रा पवार, कृषीमंत्री दत्तात्रय भरणे, माजी सहकार मंत्री हर्षवर्धन पाटील तसेच पुणे जिल्हा मध्यवर्ती सहकारी बँकेचे संचालक आप्पासाहेब जगदाळे यांच्या मार्गदर्शनाखाली पार पडली. त्यांच्या नेतृत्वावर आणि राष्ट्रवादी काँग्रेसच्या संघटनशक्तीवर मतदारांनी विश्वास दाखवला असल्याचे निकालातून स्पष्ट झाले. आपले पुढील व्हिजन स्पष्ट करताना ते म्हणाले की, पुणे जिल्हा परिषदेच्या माध्यमातून या गटातील रस्ते, पाणीपुरवठा,आरोग्य, शिक्षण, मूलभूत सुविधा आणि रोजगाराशी संबंधित कामे मार्गी लावली जातील. सर्व समाजघटकांना सोबत घेऊन या गटाचा विकास केला जाईल. याच गटातील पंचायत समिती गणाच्या उमेदवारांनाही मतदारांनी मोठ्या प्रमाणावर पाठिंबा दिल्याने जिल्हा परिषद व पंचायत समिती या दोन्ही स्तरांवर राष्ट्रवादी काँग्रेसला बळकटी मिळाली आहे. यावेळी काटी-लाखेवाडी गटाचा विकासात्मक कायापालट करण्याचा निर्धारही श्रीमंत ढोले यांनी व्यक्त केला. या विजयामुळे संपूर्ण गटात उत्साहाचे वातावरण असून, राष्ट्रवादी काँग्रेसचा हा विजय म्हणजे संघटन, विश्वास आणि विकासाभिमुख राजकारणाचा विजय असल्याची प्रतिक्रिया नागरिकांकडून व्यक्त होत आहे. दिवंगत अजितदादांच्या आशीर्वादाने आणि काटी-लाखेवाडीतील जनतेच्या प्रेमामुळे मला ही संधी मिळाली आहे. कोणताही दिखाऊ प्रचार न करता मतदारांनी मला मोठ्या फरकाने निवडून दिले, ही माझ्यासाठी मोठी जबाबदारी आहे. मिळालेल्या प्रत्येक मताचे सोने करून या गटाचा सर्वांगीण विकास करण्याचा माझा संकल्प आहे. श्रीमंत ढोले, नवनिर्वाचित सदस्य, काटी-लाखेवाडी गट अजितदादांना मतदारांची श्रद्धांजली दिवंगत नेते अजितदादा पवार यांच्या निधनानंतरची ही पहिलीच मोठी निवडणूक होती. जिल्ह्यात कोणतीही मोठी सभा किंवा रॅली न काढता मतदारांनी राष्ट्रवादीच्या विचारधारेला आणि दादांच्या विकासाभिमुख राजकारणाला साथ दिली. हा निकाल म्हणजे अजितदादांच्या कार्यकर्तृत्वाला मतदारांनी दिलेली खरी सलामी असल्याचे बोलले जात आहे.
