Wai: येथील जनता अर्बन को-ऑपरेटिव्ह बँकेच्या संचालक मंडळाच्या पंचवार्षिक निवडणुकीत अखेर ऐतिहासिक सत्ता परिवर्तन झाले. खासदार नितीन पाटील यांच्या नेतृत्वाखालील परिवर्तन पॅनेलने सर्वच्या सर्व जागांवर विजय मिळवत संस्थापक पॅनेलला धक्का दिला. बहुतांश जागांवर परिवर्तन पॅनेलच्या उमेदवारांनी 1500 ते 1600 मतांच्या फरकाने विजय मिळविला. या निकालामुळे संस्थापक पॅनेलचे नेते सुरेश कोरडे यांच्या नेतृत्वाखालील गेल्या सुमारे 30 वर्षांची एकहाती सत्ता संपुष्टात आली.

सातारा जिल्हा कार्यक्षेत्र असलेल्या जनता अर्बन बँकेच्या 2026 ते 2031 या पंचवार्षिक कालावधीसाठी संचालक मंडळाची निवडणूक झाली. संचालक मंडळातील 11 जागांपैकी भटक्या-विमुक्त जाती-जमातीसाठी राखीव असलेल्या एका जागेवर तात्याबा बबन धायगुडे (वाघोशी, ता. खंडाळा) यांची यापूर्वीच बिनविरोध निवड झाली होती. उर्वरित 10 जागांसाठी रविवारी (दि. 20) 25 मतदान केंद्रांवर मतदान झाले. त्यामध्ये 5278 सभासदांनी मतदानाचा हक्क बजावला होता. एकूण 54 टक्के मतदान झाले होते.

सोमवारी येथील प्रशासकीय इमारतीतील सभागृहात निवडणूक निर्णय अधिकारी अनिल क्षीरसागर यांच्या मार्गदर्शनाखाली सहाय्यक निवडणूक निर्णय अधिकारी संजय वेधले, स्वप्नील माळी व त्यांच्या सहकार्‍यांनी मतमोजणीची प्रक्रिया पूर्ण केली. मतमोजणीअंती परिवर्तन पॅनेलच्या सर्व उमेदवारांनी बाजी मारल्याचे स्पष्ट झाले.

निकाल जाहीर होताच परिवर्तन पॅनेलच्या विजयी उमेदवारांसह समर्थकांनी गुलालाची उधळण व फटाक्यांची आतषबाजी करत जल्लोष केला. बँकेच्या राजकारणात गेल्या तीन दशकांपासून प्रभाव असलेल्या संस्थापक पॅनेलला यावेळी मोठ्या पराभवाला सामोरे जावे लागले.

मतदारसंघनिहाय निकाल व मिळालेली मते- सर्वसाधारण मतदारसंघ (6 जागा) :

महेंद्र जमदाडे, फुलेनगर (2725), तानाजी जाधव, विठ्ठलनगर-खेड (3176), राहुल डेरे, कवठे (3183), सुभाष नवले, सातारा (3150), शेखर फरांदे, ओझर्डे (3557) आणि निळकंठ मोरे, पाचवड (3557) हे विजयी झाले.
पराभूत उमेदवारांमध्ये जगन्नाथ कदम, पसरणी (1640), सुरेश कोरडे, शहाबाग (1751), सुनील गाढवे, बोपर्डी (67), संजय चव्हाण, सुरूर (1622), सुनील जगताप, उडतरे (1611) आणि सुनील जमदाडे, फुलेनगर (1606) यांचा समावेश आहे.

महिला राखीव मतदारसंघ (2 जागा) :

वैशाली नीलेश चव्हाण, सुरूर (3407) आणि रेखा संतोष पिसाळ, व्याजवाडी (3184) विजयी झाल्या. विजया सूर्यकांत जायकर, वाई (1848) यांचा पराभव झाला.
अनुसूचित जाती-जमाती राखीव मतदारसंघ (1 जागा) :
अजय गायकवाड, कडेगाव (3347) विजयी. प्रवीण ननावरे, लोणंद (1848) पराभूत
इतर मागास प्रवर्ग राखीव मतदारसंघ (1 जागा) :
बाळकृष्ण सपकाळ, यशवंतनगर (3328) विजयी. अतुल वाईकर, वाई (1856) पराभूत.

 तीन दशकांच्या सत्तेला अखेर पूर्णविराम…

13 जून 1983 रोजी शामराव कर्णे यांनी सहकार्‍यांच्या मदतीने श्रमिक नागरी सहकारी पतसंस्थेची स्थापना केली. 1990 पर्यंत कर्णे हे संस्थेचे संस्थापक चेअरमन होते. त्यानंतर त्यांच्या नेतृत्वाखाली सुरेश कोरडे यांच्याकडे चेअरमनपदाची जबाबदारी सोपविण्यात आली. 1995 मध्ये पुन्हा शामराव कर्णे चेअरमन झाले; मात्र 1996 मध्ये त्यांनी राजीनामा दिल्यानंतर सुरेश कोरडे यांनी चेअरमनपदाची धुरा स्वीकारली.

1998 मध्ये या पतसंस्थेचे जनता सहकारी बँकेत रूपांतर झाले. त्यानंतर झालेल्या प्रत्येक पंचवार्षिक निवडणुकीत तत्कालीन विरोधकांना पराभूत करीत सुरेश कोरडे यांनी बँकेवरील आपला प्रभाव कायम ठेवला होता. मात्र, यावेळी झालेल्या निवडणुकीत परिवर्तन पॅनेलने सर्व जागांवर विजय मिळवत त्यांच्या सुमारे तीन दशकांच्या वर्चस्वाला धक्का दिला.