Hinjawadi Drug Case – पिंपरी-चिंचवडच्या हिंजवडी परिसरात आयटी हबमध्ये लाखो रुपयांचे एमडी (मेफेड्रोन) ड्रग्ज विकायला गेलेल्या टोळीचा पर्दाफाश झाला. या रॅकेटचे थेट खंडाळा कनेक्शन उघडकीस आले आहे. धक्कादायक बाब म्हणजे या आंतरजिल्हा ड्रग्ज तस्करीचा मुख्य सुत्रधार दुसरा तिसरा कोणी नसून खंडाळा तालुक्यातील अहिरे गावातील राष्‍ट्रवादी कॉंग्रेस (अजित पवार गट) माजी उपसरपंच व विद्यमान ग्रामपंचायत सदस्य दयानंद धायगुडे हाच निघाल्याने राजकीय वर्तुळात प्रचंड खळबळ उडाली आहे.

​पिंपरी-चिंचवड अंमली पदार्थ विरोधी पथक आणि खंडाळा पोलिसांनी संयुक्तरित्या केलेल्या तपासात आरोपींच्या खंडाळ्यातील रूममधून आणखी दोन लाख ८४ हजार ४०० रुपये किमतीचा २८.४४ ग्रॅम एमडी ड्रग्जचा साठा जप्त केला आहे. ​गुरुवारी (दि. ११) हिंजवडीत पोलिसांनी सापळा रचून अक्षय प्रदीप धायगुडे (वय ३१), दयानंद उत्तम धायगुडे (वय ३८) आणि महेश पुनाराम किचड उर्फ बिश्नोई (वय २१, सर्व रा. अहिरे, ता. खंडाळा) या तिघांना रंगेहात ताब्यात घेतले. ​

त्यांच्या अंगझडतीत ११ लाख ५५ हजार ५०० रुपये किमतीचे ६१.७० ग्रॅम एमडी ड्रग्ज, एक चारचाकी गाडी आणि तीन मोबाइल जप्त केले. त्‍यापैकी दयानंद धायगुडे हा माजी उपसरपंच निघाला, जो समाजसेवेच्या नावाखाली ड्रग्जचे नेटवर्क चालवत होता. ​अटक केलेल्या तिघांच्या चौकशीत अशपाक उर्फ मोन्या काझी (रा. अहिरे) आणि हनुमान किलेरी उर्फ बिश्नोई (रा. खंडाळा) या दोघांची नावे समोर आली आहेत.

…तर तालुक्याचे राजकारण धोक्यात!
लोकप्रतिनिधीच जर ड्रग्ज माफिया बनून तरुण पिढीला बरबाद करणार असतील, तर दाद कोणाकडे मागायची? असा संतप्त सवाल आता खंडाळा तालुक्यातील नागरिक विचारत आहेत. या काळ्या पैशाचा वापर राजकारणात केला जात होता का? याचा तपास आता सुरू झाला आहे.