Hingoli: हिंगोली जिल्ह्यातील सेनगाव तालुक्यातील खैरी घुमट येथील प्राचीन कानिफनाथ गडावर आज शिखरी काट्याचा नेत्रदीपक रिंगण सोहळा मोठ्या उत्साहात पार पडला. या यात्रेसाठी मराठवाडा व विदर्भातून हजारो भाविक दाखल झाले होते. नांदेड जिल्ह्यातील डोरली येथील कावडीचे आगमन झाल्यावर या यात्रेला पारंपरिकरीत्या सुरुवात होते. खडकी येथील अबदागिरी, बोरखेडी पिनगाळे आणि हत्ता नाईक येथील देवाच्या बाणांच्या भेटी या सोहळ्याचे वैशिष्ट्य आहे. शेकडो वर्षांपासून ही परंपरा अखंडपणे सुरू असून यात्रा दिवसभर भरते. दुपारी चार वाजता कानिफनाथ महाराजांच्या पालखीची मिरवणूक निघाली. विविध गावांतील मानाच्या शिखरी काठ्या व भगवे ध्वज हाती घेऊन भाविकांनी मंदिराला प्रदक्षिणा घातल्यानंतर मंदिरात शिखरी काठ्या हातावर घेऊन नृत्य करण्यात आले. हा रिंगण सोहळा पाहण्यासाठी परिसरात मोठी गर्दी उसळली होती. हेही वाचा – विनोद तावडे, रामदास आठवले यांची राज्यसभेसाठी भाजपच्या यादीत आघाडी; ‘या’ दिग्गजांचा पत्ता कट येलदरी धरणाच्या जलाशयाकाठी वसलेले हे हेमाडपंथी शैलीतील मंदिर किल्लासदृश वास्तू असल्याने भाविकांचे विशेष आकर्षण आहे. सध्या या मंदिराचे जीर्णोद्धाराचे काम सुरू असून त्यासाठी सुमारे दोन कोटी रुपयांचा निधी मंजूर करण्यात आला आहे. मध्य प्रदेशातील कारागिरांकडून हे काम प्रगतिपथावर आहे. मंदिर समितीकडून पाच दिवसांची यात्रा आयोजित करण्यात येते. दरवर्षी नवस फेडण्यासाठी येणाऱ्या भाविकांची मोठी गर्दी लक्षात घेऊन सेनगाव पोलीस ठाण्याचे निरीक्षक दीपक मस्के यांच्या मार्गदर्शनाखाली कडक पोलीस बंदोबस्त तैनात करण्यात आला होता.
