प्रभात वृत्तसेवा पुणे – एप्रिलपासून पुणे विमानतळ परिसरात फिरणाऱ्या एका प्रौढ नर बिबट्याला गुरुवारी रात्री (११ डिसेंबर) पुणे वनविभाग, रेस्क्यू चॅरिटेबल ट्रस्ट, हवाईदल-विमानतळ प्रशासनाने एकत्रित प्रयत्नातून पकडले.हा बिबट्या २८ एप्रिल रोजी पहिल्यांदा विमानतळावर धावपट्टीनजीक दिसला. त्यानंतर तो गुरुवारपर्यंत विमानतळ परिसरातील भूमिगत बोगदे, दाट झुडपे आणि कमी मानवी हालचाली असलेल्या भागांत फिरत राहिला. विमानतळाचा विस्तृत, संवेदनशील परिसर लक्षात घेता, त्याला पकडण्यात अनेक तांत्रिक आणि सुरक्षाविषयक अडचणी येत होत्या. कॅमेरा ट्रॅप, लाईव्ह कॅमेरे आणि पिंजऱ्याच्या माध्यमातून सातत्याने लक्ष ठेवण्यात आले. तरीही बिबट्या वेळोवेळी गुंगारा देत होता. डार्टचा अचूक मारा अत्यंत मर्यादित जागा असूनही, वन्यजीव वैद्यक तज्ज्ञ डॉ. गौरव मंगला यांनी बिबट्यावर डार्टचा मारा केले. त्यानंतर बिबट्याला बोगद्यातून सुरक्षित बाहेर काढून वैद्यकीय निरीक्षणासाठी हलवण्यात आले. या कारवाईत संयम, अचूकता आणि सतत परिस्थितीचे मूल्यमापन आवश्यक होते, असे डॉ. गौरव मंगला यांनी सांगितले. बिबट्याने दोन लाइव्ह कॅमेऱ्याचे नुकसान केले होते. मला अत्यंत कठीण कोनातून शॉट घ्यावा लागला. पथकांनी शांत राहून नियोजनाप्रमाणे अचूक कृती केल्याने बिबट्याला पकडता आले असेही मंगला यांनी नमूद केले. बिबट्या बावधन सेंटरमध्ये बिबट्या सध्या पूर्णपणे स्थिर असून, त्याला पुढील निरीक्षणासाठी बावधन, पुणे येथील ट्रान्झिट ट्रीटमेंट सेंटरमध्ये ठेवले आहे. ही मोहीम वनसंरक्षक आशिष ठाकरे, उपवनसंरक्षक महादेव मोहिते यांच्या मार्गदर्शनाखाली सहाय्यक वनसंरक्षक विशाल चव्हाण, मंगेश ताटे आदींच्या पथकाने पार पाडली. असे पकडले बिबट्याला चार डिसेंबरला त्याचे पुन्हा एकदा दर्शन झाले. तो एका भागात लपल्याचे स्पष्ट झाल्यावर बाहेर पडण्याचे सर्व संभाव्य मार्ग बंद केले. अतिरिक्त लाईव्ह कॅमेरे बसविले.बिबट्यांच्या हालचाली अधिक अचूकपणे समजण्यासाठी कॅमेरा ट्रॅपची फेररचना केली. या माहितीच्या आधारे, ११ डिसेंबरला ३० सदस्यांच्या संयुक्त पथकाने एक योजना राबवली. वरील तिन्ही विभागांनी समन्वयाद्वारे बिबट्याला अंदाजे ८० फूट लांबीच्या बोगद्यात जाण्यास भाग पाडले. यामुळे त्याला नियंत्रित परिस्थितीत शांतपणे बेशुद्ध करणे शक्य झाले. “ही मोहीम सक्षम समन्वयाचे उदाहरण आहे. तिन्ही विभागांनी अनेक महिन्यांपासून सातत्याने एकत्रित काम केले. संवेदनशील नागरी आणि पायाभूत सुविधांमध्येही कठीण परिस्थितींत प्रतिसाद देण्याची क्षमता यानिमित्ताने दाखवून दिली आहे.” – महादेव मोहिते, उपवनसंरक्षक, पुणे विभाग
