Majhi Ladki Bahin Yojana ।  Ajit Pawar – राज्य सरकारने लाडकी बहीण योजना सुरू केली आहे. ही योजना सुरू झाल्यापासून त्यावर टीका सुरू आहे. या योजनेत काही ना काही अडथळे आणण्याचे प्रयत्नही केले जात आहे. मात्र, राज्य सरकारने ही योजना यशस्वी करून दाखवली आहे.

मात्र, काही दिवसांपूर्वी या योजनेवर काँग्रेसचे माजी मंत्री सुनील केदार यांनी मोठं विधान केलं. ‘आमचं सरकार आल्यानंतर आम्ही लाडकी बहीण योजना बंद करू’ असं सुनील केदार यांनी म्हटलं होत. त्यानंतर आता स्वतः उपमुख्यमंत्री अजित पवार यांनी सुनील केदार यांच्यावर निशाणा साधला आहे.

अजित पवार यांनी आपल्या खास शैलीतून प्रत्युत्तर दिलं आहे. अरे पठ्ठ्या यात तू फुशारकी मारली का? योजना काय तुझ्या वडिलांची आहे का? असा आक्रमक सवालही अजित पवार यांनी सुनील केदार यांना केला आहे. तर योजना बंद करायची नसेल तर घड्याळ या चिन्हाचं बटण दाबा… असं यावेळी जाहीर सभेतून बोलताना अजित पवार यांनी नागरिकांना आवाहन केलं आहे.

शिंदे गटाचे नेते संजय निरुपम काय म्हणाले? पाहा…

शिंदे गटाचे नेते संजय निरुपम यांनी सुनील केदार यांच्या विधानावर संताप व्यक्त केला. सत्ता आल्यास लाडकी बहीण योजना बंद करू असं केदार म्हणाले आहेत. यावरून काँग्रेसची मानसिकता उघड झाली आहे. हे प्रकरण नागपूर उच्च न्यायालयात सुरू आहे. लाडकी बहीण योजना ही यशस्वी योजना आहे.

या योजनेच्या माध्यमातून १ कोटी ६० लाख महिलांना मदत मिळत आहे. महिलांमध्ये प्रचंड उत्साह आहे. लाडकी बहीण योजनेतील लाभार्थी भगिनींच्या घरी मुख्यमंत्री भेट देत आहेत. त्यामुळे काँग्रेसच्या पोटात दुखत आहे. आधीच काँग्रेसला अंतर्गत समस्यांचा सामना करावा लागत असून त्यातच लाडकी बहीण योजनेमुळे काँग्रेस हादरली आहे, असं संजय निरुपम यांनी म्हटलंय.