पिंपरी, (प्रतिनिधी) – शिकण्या-बागडण्याच्या वयात एका लहान मुलीला विद्युत अपघातात आपला एक हात गमावावा लागला. ही बाब पिंपरी चिंचवड इलेक्ट्रिकल कॉन्ट्रॅक्टर्स असोसिएशनच्या पदाधिकार्‍याांन समजली. तिच्यासाठी माणुसकीचा हात पुढे करत तिला संघटनेमार्फत त्या मुलीला नव्वद हजार रुपयांची मदत करून असोसिएशनने आपले सामाजिक कर्तव्य पूर्ण करत, संघटनेने समाजासमोर आदर्श ठेवला आहे.

देहूनजीकच्या येलवाडी भागातील आदिती जयवंत पवार ही 14 वर्षांची मुलगी आपल्या पालकांसोबत मामाच्या मुलाच्या लग्नकार्यासाठी मावळ तालुक्यातील सुदवडी येथे गेली होती. सायंकाळी आठ वाजता आदिती मामाच्या घराच्या छतावर गेली असता, घराला स्पर्शून गेलेल्या विद्युत तारांच्या संपर्कात आल्याने तिच्या हाताला व पायाला भाजण्याने गंभीर दुखापत झाली. तद्नंतर तिला तळेगाव व वायसीएम रुग्णालयात उपचाराकरिता नेले असता तेथील डॉक्टरांनी इलाज करायला असमर्थता दर्शविली.

त्यांनतर खासगी रुग्णालयात तिच्यावर इलाज करून तिचा हात निकामा झाल्याचे सांगत तिचा हात काढावा लागणार असल्याचे डॉक्टरांनी सांगितले. आदितीच्या पालकांची परिस्थिती बेताची असल्याने त्यांनी कर्ज काढून उपचार केल्याची बाब असोसिएशनला समजली. त्यांनतर सर्व सभासदांनी मिळून आदितीला मदत करण्याचे निश्चित केले.

प्रत्येक सभासदाने आर्थिक मदतीत खारीचा वाटा उचलत, जमा केलेल्या नव्वद हजार रुपयांचा चेक असोसिएशनतर्फे तिला देण्यात आला. यावेळी संघटना अध्यक्ष गिरीश बक्षी, कार्याध्यक्ष संतोष सौंदणकर उपाध्यक्ष मनोज हरपळे, जावेद मुजावर, संजय मोरे,महेश माने तसेच मानवाधिकार संघटना अध्यक्ष एम. डी. चौधरी आदी उपस्थित होते.

कारवाई करण्याची गरज
ही घटना घडून एक महिना उलटून गेला असून, महावितरणकडून कुणीही अद्याप विचारायलादेखील आलेले नाही, असे अदितीच्या पालकांचे म्हणणे आहे. शासकीय स्तरावर अजूनही दुर्घटनेची दखलही घेतली गेलेली नाही. तर या घटनेवर पांघरून घालून एकमेकांना वाचविण्याचा प्रकार दुर्दैवी आहे. आदितीचेआयुष्य एकप्रकारे उद्ध्वस्त करणार्‍यांवर कारवाई केली जाण्याची गरज आहे, असे मत संघटनेचे सचिव नितीन बोंडे यांनी व्यक्त केले.