नवी दिल्ली – केंद्र सरकार देशभरातील राष्ट्रीय महामार्गांवर 600 ठिकाणी हेलिपॅड आणि ड्रोन लॅंडिंग सुविधा उभारण्याचा विचार करत आहे. इंडियन मर्चंट्‌स चेंबरच्या कार्यक्रमात केंद्रीय मंत्री नितीन गडकरी म्हणाले की अशा सुविधांमुळे रस्ते अपघात आणि अवयव प्रत्यारोपण यासारख्या वैद्यकीय आपत्कालीन परिस्थिती हाताळण्यास मदत होईल.

राष्ट्रीय राजमार्ग प्राधिकरण राष्ट्रीय महामार्गांवर 600 हून अधिक ठिकाणी जागतिक दर्जाच्या “वेसाइड सुविधा’ विकसित करत आहे. उत्तम स्वच्छतागृहे, पार्किंग आणि रेस्टॉरंट या मूलभूत सुविधांव्यतिरिक्त, या रस्त्याच्या कडेला असलेल्या सुविधांमध्ये ट्रक चालकांसाठी वसतिगृहे, इलेक्‍ट्रिक वाहनांसाठी चार्जिंग सुविधा आणि ट्रॉमा सेंटर्स देखील असतील.

याशिवाय हस्तकला आणि स्थानिक पातळीवर बनवलेल्या उत्पादनांना प्रोत्साहन देण्यासाठी रिटेल आउटलेट्‌स असतील. रस्ते अपघात आणि अवयव प्रत्यारोपण यांसारख्या वैद्यकीय आणीबाणीला सामोरे जाण्यासाठी हेलिपॅड आणि ड्रोन लॅंडिंग सुविधा देखील असतील.

गडकरी म्हणाले, पीएम गति शक्ती राष्ट्रीय मास्टर प्लॅन हा खूप मोठा उपक्रम आहे आणि यामुळे आम्हाला लॉजिस्टिक खर्च कमी करण्यास मदत होईल. उच्च लॉजिस्टिक खर्चामुळे जागतिक बाजारपेठेतील “मेड इन इंडिया’ उत्पादनांची स्पर्धात्मकता कमी होते.

जीडीपीच्या 9 टक्‍क्‍यांपर्यंत लॉजिस्टिक खर्च कमी करणे हा सरकारच्या अजेंड्यावर आहे. गडकरी म्हणाले, 2025 पर्यंत देशाची अर्थव्यवस्था $5 ट्रिलियन होण्याचे लक्ष्य साध्य करण्यासाठी एक मजबूत, स्थिर, निर्णायक आणि पारदर्शक सरकार ही गुरुकिल्ली आहे.