US-Iran War news – अमेरिकेने रविवारी सकाळी इराणवर जोरदार हल्ला केला. अमेरिकेने केलेल्या हल्ल्यांना प्रत्युत्तर म्हणून इराणने बहरीन, कुवेत, कतार, संयुक्त अरब अमिराती आणि ओमानमध्ये जोरदार प्रतिहल्ले केले आहेत. संपूर्ण इराणमधील तब्बल १४० ठिकाणांवर मारा केल्याचे अमेरिकेच्या सेंट्रल कमांडने म्हटले आहे.

यापुर्वी अमेरिकेने दोन वेळा केलेल्या हल्ल्यांमध्ये जितक्या ठिकाणांवर मारा केला होता, त्यापेक्षाही आज लक्ष्य केलेल्या ठिकाणांची संख्या अधिक होती. आजच्या हल्ल्यादरम्यान क्षेपणास्त्रे,ड्रोन लॉंच ठिकाणे,दारुगोळ्याची कोठारे, संवादाची साधने आणि अन्य ठिकाणांना लक्ष्य केले गेले. होर्मूझच्या सामुद्रधुनीमधून मुक्तपणे प्रवास करणाऱ्या सामान्य बोटी आणि व्यवसायिक जहाजांना लक्ष्य करण्याच्या इराणच्या क्षमतेवर प्रहार करण्यात आला, असेही यूएस सेंट्रल कमांडने म्हटले आहे.

अमेरिकेच्या हल्ल्यांना प्रत्युत्तर देण्यासाठी इराणने अमेरिकेचे लष्करी तळ असलेल्या आखाती देशांवर हल्ले केले. होर्मूझवर इराणचेच नियंत्रणराहिले पाहिजे आणि या सागरी मार्गाने प्रवास करणाऱ्या जहाजांना इराणला टोल द्यावा लागेल, असे देखील म्हटले आहे. इराणच्या क्षेपणास्त्रांच्या हल्ल्यांचे इशारे देण्यासाठी आखाती देशांमध्ये वारंवार सायरन वाजवले गेले. इराणची क्षेपणास्त्रे हवेतच रोखल्याचा दावा कतारने केला.

या क्षेपणास्त्रांचे अवशेष पडल्यामुळे एका लहान मुलासह तिघे जखमी झाल्याचे कतारच्या गृहमंत्रालयाने म्हटले आहे. तर शेजारच्या युएईमध्ये स्फोटांचे मोठे आवाज ऐकू आले. बहरीनमध्ये आज एकाच दिवशी तिसऱ्यांदा सायरन वाजवले गेले. इराणची क्षेपणास्त्रे हवेतच रोखल्याचेही बहरीनच्या लष्कराने म्हटले आहे.

होर्मूझच्या एका किनाऱ्यावरील ओमानमध्येही ड्रोन हल्ले झाले. देशाच्या ईशान्येकडील भागात ड्रोन हल्ला झाल्याचे ओमानच्या सरकारी वृत्तसंस्थेने म्हटले आहे. ओमानवरील हल्ल्याची जबाबदारी इराणने पुर्वी स्वीकारली होती. पण ओमानच्या सुलतानांनी याला दुजोरा दिला नव्हता. होर्मूझच्या व्यवस्थापनाबाबत दोन्ही देशांची शनिवारीच चर्चा झाली होती. तरी इराणने ओमानवर हल्ला केला आहे.

यूएईमध्ये कोणत्या ठिकाणांना लक्ष्य केले गेले, हे समजू शकले नाही. मे महिन्यात इराणने आबुधाबी आणि दुबईवर हल्ले केले होते. तेथील अणू ऊर्जा प्रकल्पांवरही ड्रोन डागले होते. इराणने अन्य काही ठिकाणांवरही हल्ल्यांचे दावे केले आहेत. पण त्याची पडताळणी केली जाऊ शकलेली नाही.

होर्मूझमध्ये पुन्हा तणावाची भीती

अमेरिका आणि इराणमध्ये कायमच्या युद्धबंदी करारासाठीच्या वाटाघाटींमध्ये होर्मूझची सामुद्रधुनी हा महत्वाचा मुद्दा राहिला आहे. युद्धादरम्यान इराणने या सामुद्रधुनीवरील आपली पकड अधिकच घट्ट केल्यामुळे जागतिक तेल बाजारातील तेलाच्या किंमती भडकल्या आहेत. युद्धबंदीच्या वाटाघाटी सुरू झाल्यापासून या किंमती कमी होऊ लागल्या असल्या तरी नव्याने तणाव निर्माण हो लागल्याने पुन्हा पुर्वीची स्थिती निर्माण होण्याची भीती आहे.

शेरेबाजी आणि इशारे

हंगामी युद्धविराम संपुष्टात आल्याचे ट्रम्प यांनी म्हटल्यानंतर अमेरिकेने हा मोठा हल्ला केला आहे.इराणने स्वतःसाठी एक वाईट पर्याय निवडला असून आता त्याची किंमत इराणला मोजावी लागत असल्याचे अमेरिकेचे संरक्षण मंत्री पीट हेगसेथ यांनी म्हटले आहे. मात्र या टीकेवर इराणच्या संसदेचे सभापती मोहम्मद बाघेर कालिबाफ यांनी प्रत्युत्र दिले हे. एकतर्फी करार संपला आहे. तुम्ही तुमचा शब्द पाळा किंवा त्याची किंमत मोजा, असे आम्ही म्हणालो होतो. आता सत्य येतच आहे, असे ते म्हणाले.

सायप्रसच्या जहाजावर इराणचा हल्ला

होर्मूझच्या सामुद्रधुनीमधील सायप्रसचा ध्वज असलेल्या जहाजावर इराणने मारा केल्यामुळे या जहाजाला आग लागली होती आणि जहाजावरील कर्मचाऱ्यांना जहाज सोडून जावे लागले होते. हे जहाज ओमानच्या किनाऱ्याजवळून प्रवासकरत होते, असे ब्रिटीश मेरीटाईम ट्रेड ऑपरेशन्स सेंटरने म्हटले आहे. गेल्या काही दिवसांपासून जहाजे याच मार्गाने होर्मूझमधून बाहेर पडत आहेत. या जहाजाने मान्यताप्राप्त मार्गानेच प्रवास करण्याबाबतचे इशारे आणि सूचनांकडे दुर्लक्ष केल्याने थांबण्यास भाग पाडले गेले, असे रिव्होल्युशनरी गार्डनी म्हटले आहे.