Telegram – सुरक्षेच्या कारणास्तव नीटी-युजी पुनर्परीक्षेपूर्वी भारतातील आपल्या सेवा तात्पुरत्या स्वरूपात बंद करण्याच्या केंद्र सरकारच्या निर्णयाला आव्हान देत मेसेजिंग प्लॅटफॉर्म टेलिग्रामने बुधवारी दिल्ली उच्च न्यायालयात धाव घेतली. या याचिकेची दखल घेत दिल्ली उच्च न्यायालयाने उद्या, १८ जून रोजी सुनावणी निश्‍िचत केली आहे.

केंद्र सरकारने टेलिग्रामवर २२ जूनपर्यंत तात्पुरते निर्बंध घातले आहेत. या निर्णयाचे नॅशनल टेस्टिंग एजन्सीने स्वागत केले असून, परीक्षा देणाऱ्या उमेदवारांची फसवणूक रोखणे आणि चुकीची माहिती पसरण्यापासून रोखणे हा या कारवाईचा उद्देश असल्याचे म्हटले आहे.

न्या. तेजस कारिया यांच्या सुट्टीकालीन खंडपीठासमोर वकील माधव खोसला यांनी हे प्रकरण तातडीने सुनावणीसाठी मांडले. न्यायालयाने याचिकेवर सुनावणी घेण्याचे मान्य केले. भारतात टेलिग्रामवर नियामक पातळीवरून वाढलेली देखरेख आणि तपासणी सुरू असतानाच ही घडामोड समोर आली आहे.

दरम्‍यान, २१ जून रोजी होणाऱ्या नीटी-युजी पुनर्परीक्षेच्या प्रश्नपत्रिका कथितरीत्या फुटल्याच्या (पेपर लीक) संदर्भातील चिंतांमुळे केंद्र सरकारने गुगल आणि ॲपल यांना २२ जूनपर्यंत आपापल्या ॲप स्टोअर्सवरून हे ॲप काढून टाकण्याचे निर्देश दिले आहेत.