Amit Shah and Rahul Gandhi |  काँग्रेस खासदार राहुल गांधी यांनी सभागृहात बोलू दिलं जात नसल्याचा आरोप केला होता. त्यावर केंद्रीय गृहमंत्री अमित शाह यांनी राहुल गांधींवर जोरदार टीका केली. लोकसभेत बोलण्यासाठी त्यांना जेव्हा वेळ दिली होती, तेव्हा लोकसभेचे विरोधी पक्षनेते व्हिएतनाममध्ये होते. यावेळी त्यांनी कर्नाटकात काँग्रेस सरकारने मुस्लिमांसाठी जाहीर केलेले चार टक्के आरक्षण म्हणजे “लॉलीपॉप” असल्याचेही म्हटले.

काय म्हणाले अमित शाह?   

संसदेच्या कामकाजावर राहुल गांधी यांनी केलेल्या टीकेला गृहमंत्री अमित शाह यांनी यावेळी प्रत्युत्तर दिले. अमित शाह म्हणाले की, “सभागृहात बोलण्याचे काही नियम असतात हे लोकसभेमधील विरोधी पक्षनेत्यांना कदाचित माहिती नसावे. सभागृह मनमानी पद्धतीने चालवता येत नाही. त्यांना अर्थसंकल्पावर चर्चेसाठी ४२ टक्के वेळ देण्यात आली होती. आता कुणी बोलावं हा त्यांचा प्रश्न आहे. मात्र जेव्हा संसदेत गंभीर विषयांवर चर्चा सुरू होती, तेव्हा ते व्हिएतनाममध्ये होते. तसेच जेव्हा ते माघारी परतले, तेव्हा त्यांनी आपल्या इच्छेनुसार बोलण्याचा हट्ट सुरू केला.”

संसदेचं कामकाज हे नियम आणि प्रक्रियांनुसार चालतं. एका कुटुंबाकडून चालवण्यात येणाऱ्या काँग्रेस पक्षाप्रमाणे चालत नाही, असा टोलाही त्यांनी लगावला. “धर्माच्या आधारावर देण्यात येणारे कोणत्याही प्रकारचे आरक्षण हे संविधानाचे उल्लंघन करणारे आहे. त्यामुळे न्यायालये ते रद्द करतील. धर्माच्या आधारावर देण्यात येणाऱ्या आरक्षणाला आमचा विरोध आहे”, असे अमित शाह यांनी स्पष्ट केले. Amit Shah and Rahul Gandhi |

राहुल गांधींनी काय केला होता आरोप?  

लोकसभेचे विरोधी पक्षनेते राहुल गांधी यांनी काही दिवसांपूर्वी त्यांना संसदेत बोलू दिले जात नसल्याचा आरोप केला होता. “सभागृहात जेव्हा विरोधी पक्षनेता उभा राहतो, तेव्हा त्याला बोलू दिले पाहिजे, असे संकेत आहेत. मी जेव्हा सभागृहात उभा राहतो, तेव्हा मला बोलू दिले जात नाही. मागच्या सात-आठ दिवसांपासून मला बोलूच दिले नाही. सभागृह अशाप्रकारे चालू शकत नाही. लोकशाहीमध्ये सरकार आणि विरोधक या दोघांचीही स्वतःचे एक स्थान असते. पण येथे विरोधकांचे काहीच स्थान नाही. इथे फक्त सरकारच दिसते,” असा आरोप राहुल गांधी यांनी केला होता.  Amit Shah and Rahul Gandhi |

हेही वाचा: 

“पंतप्रधान मोदी एक महान मित्र…”; डोनाल्ड ट्रम्प यांनी कौतुक करत दिला टॅरिफबाबत इशारा