HDFC Bank Share: एचडीएफसी बँकेचे व्यवस्थापकीय संचालक आणि मुख्य कार्यकारी अधिकारी (MD & CEO) शशीधर जगदीशन यांनी सध्याचा कार्यकाळ संपल्यानंतर पुनर्नियुक्तीसाठी अर्ज न करण्याचा निर्णय घेतला आहे. या निर्णयाचा परिणाम सोमवारी बँकेच्या शेअरवर दिसून आला. सुरुवातीच्या व्यवहारात जोरदार वाढ झाल्यानंतर एचडीएफसी बँकेचा शेअर 1.56 टक्क्यांनी घसरून 709 रुपयांवर बंद झाला.

जगदीशन यांच्या निर्णयाची माहिती समोर आल्यानंतर शेअरमध्ये सुरुवातीला तेजी दिसली. एनएसईवर सकाळच्या सत्रात शेअर 2.70 टक्क्यांपर्यंत वधारला होता. मात्र, नंतर ही वाढ पूर्णपणे गमावून शेअर घसरणीसह बंद झाला.

26 ऑक्टोबरला होणार निवृत्त –

61 वर्षीय शशीधर जगदीशन हे एचडीएफसी बँकेत जवळपास तीन दशकांपासून कार्यरत आहेत. ते 26 ऑक्टोबर रोजी निवृत्त होणार आहेत. ऑक्टोबर 2020 मध्ये त्यांनी बँकेच्या एमडी आणि सीईओ पदाची जबाबदारी स्वीकारली होती. सध्या ते दुसरा तीन वर्षांचा कार्यकाळ पूर्ण करत आहेत.

जगदीशन यांनी पुनर्नियुक्तीसाठी अर्ज न करण्याचा निर्णय संचालक मंडळाला कळवला. संचालक मंडळाने त्यांना निर्णय बदलण्याची विनंती केली. मात्र, त्यानंतरही जगदीशन यांनी आपल्या निर्णयावर ठाम राहण्याचे स्पष्ट केले.

उत्तराधिकाऱ्याच्या निवडीची प्रक्रिया सुरू –

एचडीएफसी बँकेच्या संचालक मंडळाकडून जगदीशन यांच्या उत्तराधिकाऱ्याची निवड आणि नियुक्तीची प्रक्रिया वेगाने सुरू करण्यात येणार आहे. ही प्रक्रिया योग्य वेळेत पूर्ण केली जाईल, असे बँकेने स्पष्ट केले आहे.

संचालक मंडळाने जगदीशन यांच्या नेतृत्वाचे आणि बँकेच्या वाढीसाठी तसेच स्थिरतेसाठी दिलेल्या योगदानाचे कौतुक केले आहे. भारतातील सर्वात मोठ्या विलीनीकरणांपैकी एक असलेल्या एचडीएफसी लिमिटेड आणि एचडीएफसी बँकेच्या विलीनीकरणाच्या प्रक्रियेत जगदीशन यांनी महत्त्वाची भूमिका बजावल्याचेही बँकेने म्हटले आहे.