Stock Market : भारताची अर्थव्यवस्था वेगाने वाढत असतानाही विदेशी गुंतवणूकदार भारतीय शेअर बाजारातून पैसा काढत आहेत. आर्थिक वर्ष 2026-27च्या पहिल्या तिमाहीत भारताची GDP वाढ 7.8 टक्के झाली. ही वाढ पाहता भारतीय अर्थव्यवस्था मजबूत असल्याचे दिसते. मात्र, विदेशी गुंतवणूकदारांना सध्या अमेरिका आणि इतर बाजार अधिक आकर्षक वाटत आहेत.

जाणून घ्या कारणे –

मोतीलाल ओसवाल अहवालानुसार, अमेरिकेतील सरकारी रोख्यांवर चांगला परतावा मिळत आहे. ऑक्टोबरच्या मध्यात अमेरिकेच्या 10 वर्षांच्या सरकारी रोख्यांचा परतावा सुमारे 5.1 टक्क्यांवर पोहोचला. त्यामुळे अधिक जोखीम असलेल्या भारतीय बाजाराऐवजी काही गुंतवणूकदार अमेरिकेत पैसा ठेवण्यास प्राधान्य देत आहेत.

अमेरिकेतील महागाई वाढल्याने फेडरल रिझर्व्हकडून व्याजदर कपातीची शक्यता कमी झाली आहे. व्याजदर जास्त राहिल्यास डॉलर मजबूत राहू शकतो. डॉलरच्या तुलनेत रुपया कमजोर झाल्यास विदेशी गुंतवणूकदारांना भारतातील शेअर्समधून मिळणारा परतावा डॉलरच्या हिशोबात कमी होतो.

याशिवाय, जगभरात कृत्रिम बुद्धिमत्ता म्हणजेच AIशी संबंधित कंपन्यांमध्ये मोठ्या प्रमाणात गुंतवणूक झाली आहे. अमेरिका, तैवान आणि दक्षिण कोरियातील तंत्रज्ञान व चिप कंपन्यांना त्याचा फायदा झाला. भारतात अशा कंपन्यांची संख्या तुलनेने कमी असल्याने या गुंतवणुकीचा थेट फायदा भारतीय बाजाराला कमी झाला.

मात्र, आता AI कंपन्यांच्या शेअर्सवर दबाव वाढत आहे. AIसाठी कंपन्या मोठ्या प्रमाणात खर्च करत आहेत. त्यातून अपेक्षेप्रमाणे नफा मिळेल का, याबाबत गुंतवणूकदारांमध्ये चिंता आहे. त्यामुळे या कंपन्यांमधून पैसा बाहेर पडल्यास तो भारतासारख्या बाजारांकडे वळू शकतो.

भारताला विदेशी पैसा मिळण्यासाठी अमेरिकेतील रोख्यांवरील परतावा कमी होणे, डॉलर कमजोर होणे आणि जागतिक बाजारातील चिंता कमी होणे महत्त्वाचे आहे. मात्र, AI शेअर्समध्ये मोठी घसरण होऊन जागतिक बाजारात संकट निर्माण झाल्यास भारतातूनही पैसा बाहेर जाऊ शकतो. कच्च्या तेलाच्या किमतीही भारतीय बाजारासाठी महत्त्वाच्या ठरतील.

डिस्क्लेमर : ही बातमी मोतीलाल ओसवालच्या रिसर्च रिपोर्टवर आधारित आहे. यातील माहिती गुंतवणुकीचा सल्ला नाही. शेअर बाजारातील गुंतवणूक जोखमीच्या अधीन आहे. कोणताही निर्णय घेण्यापूर्वी आर्थिक सल्लागाराचा सल्ला घ्या.