Haveli Election Result – नुकत्याच पार पडलेल्या जिल्हा परिषद व पंचायत समिती निवडणुकीत राष्ट्रवादी काँग्रेस पक्षाने हवेली तालुक्यात जिल्हा परिषद गटात एकूण सहा पैकी चार जागा जिंकून उल्लेखनीय यश मिळवले. मात्र पंचायत समितीच्या गणात बारा पैकी केवळ सहा जागांवर समाधान मानावे लागले.भारतीय जनता पक्षने चार जागा जिंकल्या, तर शिवसेनाला एक जागा मिळाली. लोणी काळभोर वडकी गणात एक अपक्ष उमेदवार विजयी झाला. या निकालावरून हवेली तालुक्यातील पंचायत समिती गणात राष्ट्रवादी काँग्रेसला आत्मचिंतनाची गरज असल्याचे नागरिकांमध्ये बोलले जात आहे. पंचायत समितीत सहा जागा राष्ट्रवादी काँग्रेसकडे तर सहा जागा विरोधकांकडे गेल्याने सभापतीपदासाठी पक्षाला आणखी एका सदस्याच्या पाठिंब्याची आवश्यकता भासणार आहे. त्यामुळे सभापतीपद कोणाच्या पाठिंब्याने ठरणार, याकडे राजकीय वर्तुळाचे लक्ष लागले आहे. निवडणुकीत अपेक्षित यश न मिळाल्याने राष्ट्रवादी काँग्रेससमोर अंतर्गत आव्हाने आणि रणनीतीतील कमकुवतपणा स्पष्ट झाला आहे. तिकीट वाटपातील नाराजीचा फटका बसल्याची चर्चा आहे. त्याचा फायदा भारतीय जनता पक्षाला झाल्याचे मतदारसंघनिहाय निकालावरून दिसून येते. जिल्हा परिषद पुणे पेरणे व लोणीकंद गणात दोन्ही उमेदवार भारतीय जनता पक्षाचे विजयी झाले. कदमवाकवस्ती गणात राष्ट्रवादी काँग्रेसच्या उमेदवाराने 220 मतांची आघाडी घेत विजय मिळवला. लोणी काळभोर वडकी गणात अपक्ष उमेदवाराने दोन्ही प्रमुख पक्षांना धक्का देत विजय संपादन केला. उरुळी कांचन गणात राष्ट्रवादी काँग्रेस विजयी झाली, तर सोरतापवाडी गणात भारतीय जनता पक्षाने 687 मतांची आघाडी घेत जागा जिंकली. थेऊर गट व गणात राष्ट्रवादी काँग्रेसने पॅनेलनिहाय मतदानात तीनही उमेदवार विजयी केले. युवराज काकडे यांनी 5212 मतांची आघाडी घेत विजय मिळवला, तर आव्हाळवाडी गणात सुषमा मुरकुटे यांनी 5261 मतांची आघाडी घेतली. केसनंद गणात भारतीय जनता पक्ष विजयी झाला, तर खेडशिवापूर गणात शिवसेनेने बाजी मारली. कोरेगाव मूळ गणात अत्यंत अटीतटीच्या लढतीत भारतीय जनता पक्षाच्या उमेदवाराचा अवघ्या चार मतांनी पराभव झाला. येथे झालेली चुरशीची लढत राष्ट्रवादी काँग्रेस एकसंधतेचा अभाव असल्याचे संकेत देणारी ठरल्याची चर्चा आहे. या गणात भारतीय जनता पक्षाने प्रभावी प्रचारयंत्रणा वापरून पक्षचिन्ह घराघरांत पोहोचवले. अंतर्गत गटबाजी व तिकीट वाटपातील नाराजीमुळे पारंपरिक मतांमध्ये विभाजन झाल्याचे दिसून येत आहे. अवघ्या चार मतांनी मिळालेला विजय आत्मपरीक्षण करण्यासारखा असल्याचे नागरिकांचे मत आहे. जर या गणात भारतीय जनता पक्षाचा उमेदवार विजयी झाला असता, तर हवेली पंचायत समितीतील सत्तासमीकरणे वेगळी दिसली असती, अशी चर्चा पूर्व हवेली परिसरात सुरू आहे.
