Omraje Nimbalkar : अखेर सस्पेन्स संपला? उद्धव ठाकरेंचा फोन; ओमराजेंनी मनातली गोष्ट सांगितली “मी खासदार आहे ते…”
Omraje Nimbalkar : ओमराजे निंबाळकर यांची भेट घेऊन त्यांची समजूत काढण्याचा प्रयत्न केला असल्याची माहिती समोर आली आहे.
Omraje Nimbalkar : काही दिवसांपासून धाराशिवचे ठाकरे गटाचे खासदार ओमराजे निंबाळकर शिंदे गटात जाणार असल्याच्या चर्चांनी राजकीय वर्तुळात जोर धरला होता. ठाकरे गटातील काही फुटीर खासदारांमध्ये त्यांचंही नाव घेतलं जात होतं. तसेच शिंदे गटाकडून त्यांना आपल्याकडे वळवण्यासाठी प्रयत्न सुरू असल्याचीही चर्चा होती. अशातच आता ठाकरे गटाकडून ओमराजेंची मनधरणी करण्याचे प्रयत्न सुरू झाले आहेत.
ओमराजे यांचे वडील पवनराजे निंबाळकर यांच्या हत्याकांडाच्या निकालानंतर त्यांनी माध्यमांना प्रतिक्रिया दिली होती. ते म्हणाले होते की, “मी अद्याप कोणताही निर्णय घेतलेला नाही. पक्ष सोडलेला नाही. मी मतदारसंघात जाऊन कार्यकर्त्यांशी चर्चा करेन, त्यानंतरच निर्णय घेईन.” यानंतर काल मध्यरात्री मोठी राजकीय घडामोड घडली. पुण्यात ठाकरे गटाचे नेते वरुण सरदेसाई आणि ओमराजेंचे मित्र आमदार कैलास पाटील यांनी त्यांची भेट घेतली. ओमराजे निंबाळकर यांची भेट घेऊन त्यांची समजूत काढण्याचा प्रयत्न केला असल्याची माहिती समोर आली आहे.
ओमराजेंना उद्धव ठाकरेंचा फोन
दरम्यान, अशातच एक मोठी बातमी समोर आली आहे. राजकीय सूत्रांच्या माहितीनुसार, उद्धव ठाकरे आणि ओमराजे निंबाळकर यांच्यात फोनवर संवाद झाला असून, या संवादात उद्धव ठाकरे यांनी त्यांची भूमिका जाणून घेतली. यावेळी ओमराजे यांनी आपण अद्याप कोणताही निर्णय घेतलेला नाही आणि पक्षासोबत असल्याचे स्पष्ट केल्याची माहिती आहे.
Omraje Nimbalkar
“आपणच मला मोठं केलं आहे. मी खासदार आहे ते पक्षामुळे आणि तुमच्यामुळेच. त्यामुळे मी कोणताही अंतिम निर्णय घेतलेला नाही. कार्यकर्त्यांशी चर्चा करून पुढील निर्णय घेईन,” असे त्यांनी उद्धव ठाकरेंना सांगितल्याचे सूत्रांकडून समजते. या घडामोडीनंतर ओमराजे निंबाळकर ठाकरे गटातच राहण्याची शक्यता व्यक्त केली जात आहे. त्यामुळे शिंदे गटाच्या संभाव्य ‘ऑपरेशन टायगर’ला धक्का बसल्याची राजकीय वर्तुळात चर्चा सुरू झाली आहे. तसेच फुटीर खासदारांच्या संख्याबळावरही याचा परिणाम होऊ शकतो, त्यामुळे अॅापरेशन टायगर फिस्कटले जाऊ शकते.
पुण्यात मध्यरात्री ओमराजेंची अचानक भेट
खासदार ओमराजे निंबाळकर यांच्या निवासस्थानी ठाकरे गटाचे नेते आणि आमदार वरुण सरदेसाई आणि आमदार कैलास पाटील यांनी अचानक भेट घेतली. या भेटीला विशेष महत्व प्राप्त झाले. या गुप्त भेटीबाबत प्रतिक्रिया देताना वरुण सरदेसाई आणि कैलास पाटील यांनी कोणताही राजकीय हेतू नसल्याचा दावा केला. “आम्ही केवळ मित्र म्हणून ओमराजे यांची विचारपूस करण्यासाठी गेलो होतो,” असे त्यांनी सांगितले. सरदेसाई म्हणाले, “ओमराजे निंबाळकर हे मशाल चिन्हावर निवडून आलेले खासदार आहेत. त्यांच्या वडिलांच्या हत्या प्रकरणातील निकालामुळे त्यांच्या कुटुंबाला मोठा धक्का बसला आहे. त्यामुळे आम्ही त्यांची भेट घेऊन सांत्वन केले.”
