Harmanpreet Kaur : आशियाई क्रीडा स्पर्धेत हरमनप्रीत कौरच्या नेतृत्वाखाली भारतीय महिला संघाने सुवर्णपदकावर नाव कोरले. या ऐतिहासिक कामगिरीनंतर भारतीय क्रिकेटप्रेमींमध्ये आनंदाचे वातावरण असतानाच हरमनप्रीत कौरने घेतलेल्या एका निर्णयाने सर्वांनाच मोठा धक्का बसला आहे.

हरमनप्रीत कौरने भारतीय महिला संघाचे कर्णधारपद सोडण्याचा निर्णय घेतला आहे. तिने स्वतः इंस्टाग्रामवर पोस्ट शेअर करत याबाबत माहिती दिली. मात्र, कर्णधारपद सोडण्यामागचे नेमके कारण तिने स्पष्ट केलेले नाही.

हरमनप्रीतच्या या निर्णयानंतर क्रिकेट वर्तुळात विविध चर्चांना उधाण आले आहे. विशेष म्हणजे आशियाई क्रीडा स्पर्धेत संघाला सुवर्णपदक मिळवून दिल्यानंतरच तिने हा निर्णय जाहीर केल्याने अनेक उलट सुलट चर्चांही सुरू आहेत.

चाहत्यांना मोठा धक्का 

हरमनप्रीत कौरच्या नेतृत्वाखाली भारतीय महिला संघाने अनेक महत्त्वाच्या सामन्यांमध्ये उल्लेखनीय कामगिरी केली आहे. “आज मी भारतीय महिला क्रिकेट संघाच्या सर्व फॉरमॅटमधील कर्णधारपदावरून पायउतार होत आहे. हा निर्णय घेणे सोपे नव्हते. यामध्ये वर्षांनुवर्षांच्या आठवणी, भावना, त्याग आणि असे क्षण सामावले आहेत, जे माझ्या उर्वरित आयुष्यात कायम माझ्यासोबत राहतील.” असे पोस्टमध्ये हरमनप्रीत कौर हिने म्हटले आहे. तिच्या या निर्णयामुळे तिच्या चाहत्यांना मोठा धक्का बसला आहे.

Harmanpreet Kaur

पोस्टमध्ये हरमनप्रीत म्हणते “मी या संघासाठी आणि भारतीय महिला क्रिकेटसाठी माझे सर्वस्व पणाला लावले. माझे रक्ताचे पाणी केले, घाम गाळला, वेळ दिला आणि अनेकदा माझ्या स्वतःच्या खेळाचा व वैयक्तिक महत्त्वाकांक्षेचा बळीही दिला. असे अनेक क्षण आले जेव्हा मला माझे वैयक्तिक प्रदर्शन, माझी स्वतःची प्रगती आणि मला माझ्यासाठी काय हवे आहे हे बाजूला ठेवावे लागले, कारण ‘संघ नेहमी प्रथम आला पाहिजे’ यावर माझा ठाम विश्वास होता.”

 

View this post on Instagram

 

A post shared by Harmann (@imharmanpreet_kaur)

“एक कर्णधार म्हणून मला अनेक कठीण निर्णय घ्यावे लागले. जे अजिबात सोपे नव्हते आणि ज्यांची कधीकधी मला वैयक्तिक किंमत मोजावी लागली. पण मी घेतलेला प्रत्येक निर्णय ‘संघ’ अधिक मजबूत करण्यासाठीचा होता. इतर खेळाडूंना पुढे जाण्याची, स्वतःवर विश्वास ठेवण्याची आणि स्वतःतील सर्वोत्तम खेळाडू घडवण्याची संधी देणे, हा त्यामागचा उद्देश होता.” असेही तिने पोस्टमध्ये म्हटले आहे.

हा प्रवास असाच सुरू राहील

आज मी मनामध्ये अनेक भावना घेऊन, पण शांत आणि समाधानी अंतःकरणाने कर्णधारपद सोडत आहे. मी माझे कर्तव्य पूर्ण केले आहे, असे मला वाटते. माझ्याकडे जे काही होते ते सर्व मी या संघाला दिले. कर्णधारपद आज संपत असले, तरी भारतीय क्रिकेटवरील माझे प्रेम कधीही संपणार नाही. आता, मी पुन्हा एकदा फक्त खेळावरील प्रेमासाठी मैदान गाजवायला तयार आहे. हा प्रवास असाच सुरू राहील,” अशा शब्दांत तिने पोस्टचा शेवट केला आहे. हरमनप्रीतच्या या निर्णयानंतर आता भारतीय महिला संघाच्या कर्णधारपदाची माळ सध्याची उपकर्णधार स्मृती मानधनाच्या गळ्यात पडणार असल्याचे बोलले जात आहे.

Harshada Deshmukh : मोठी बातमी! पुणे पदवीधरसाठी शरद पवारांच्या राष्ट्रवादीकडून उमेदवार जाहीर; कोण आहेत हर्षदा देशमुख-जाधव?