Hardeep Singh Puri : उत्तर प्रदेशनंतर आता मध्य प्रदेशातून राज्यसभेत; हरदीप सिंह पुरी यांनी घेतली खासदारकीची शपथ
Hardeep Singh Puri : केंद्रीय मंत्री हरदीप सिंह पुरी यांनी मध्य प्रदेशातून राज्यसभा सदस्य म्हणून शपथ घेतली. उत्तर प्रदेशच्या जागेचा राजीनामा दिल्यानंतर त्यांचा कार्यकाळ २०३० पर्यंत राहणार आहे.

Hardeep Singh Puri : केंद्रीय मंत्री हरदीप सिंह पुरी यांनी मंगळवारी (ता. १७) मध्य प्रदेशातून राज्यसभेचे सदस्य म्हणून शपथ घेतली. राज्यसभेचे सभापती आणि उपराष्ट्रपती सी. पी. राधाकृष्णन यांनी संसद भवनात त्यांना पदाची शपथ दिली.
उपराष्ट्रपती कार्यालयाने समाजमाध्यमावरून ही माहिती दिली. या कार्यक्रमाला केंद्रीय मंत्री मनसुख मांडविया, राजीव रंजन सिंह आणि अर्जुन राम मेघवाल यांच्यासह राज्यसभेचे महासचिव पी. सी. मोदी उपस्थित होते. पुरी यांच्या पत्नी आणि माजी राजनयिक लक्ष्मी पुरी याही कार्यक्रमाला उपस्थित होत्या.
उत्तर प्रदेशच्या जागेचा दिला राजीनामा –
हरदीप सिंह पुरी यांनी १४ नोव्हेंबर रोजी उत्तर प्रदेशमधून असलेल्या राज्यसभा सदस्यत्वाचा राजीनामा दिला होता. त्यांचा राजीनामा सभापतींनी स्वीकारला होता. त्याआधी ५ नोव्हेंबर रोजी त्यांची मध्य प्रदेशातून राज्यसभेवर बिनविरोध निवड झाली होती.
उत्तर प्रदेशमधील त्यांचा कार्यकाळ २५ नोव्हेंबरला संपणार होता. मात्र, आता मध्य प्रदेशातून त्यांचा नवीन कार्यकाळ २ एप्रिल २०३० पर्यंत राहणार आहे.
एल. मुरुगन यांच्या राजीनाम्यामुळे जागा रिक्त –
मध्य प्रदेशातील राज्यसभेची ही जागा माजी केंद्रीय मंत्री एल. मुरुगन यांच्या राजीनाम्यामुळे रिक्त झाली होती. त्यांनी गेल्या महिन्यात राज्यसभा सदस्यत्वाचा राजीनामा दिला होता. त्यानंतर या जागेसाठी हरदीप सिंह पुरी यांची निवड झाली.





