पुणे ,{प्रभात वृत्तसेवा} – कात्रज परिसरात फाॅरेन सिटी एक्झिबेशनमध्ये वडिलांसोबत गेलेल्या आठ वर्षांच्या शाळकरी मुलाचा विजेच्या धक्क्याने मृत्यू झाल्याची घटना घडली. याप्रकरणी प्रदर्शनाचे संयोजकांसह विद्युत पाळण्याच्या मालकाविरुद्ध भारती विद्यापीठ पोलिसांनी गुन्हा दाखल केला. शाळेला सुट्टी असल्याने वडिला मुलाला घेऊन विद्युत पाळण्यात बसायला गेले होते.

गणेश राजू पवार ( ८, रा. गोकुळनगर, कात्रज-कोंढवा रस्ता) असे मृत्युमुखी पडलेल्या मुलाचे नाव आहे. याबाबत त्याचे वडील राजू पांडू पवार ( ३७) यांनी भारती विद्यापीठ पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, फाॅरेन सिटी एक्झिबेशनचे संयाेजक तसेच विद्युत पाळण्याच्या मालकाविरुद्ध दुर्घटनेस जबाबदार असल्याप्रकरणी गुन्हा दाखल करण्यात आला आहे.

पोलिसांनी दिलेल्या माहितीनुसार, कात्रज-कोंढव्या रस्त्यावरील मोकळ्या जागेत फाॅरेन सिटी एक्झिबेशनचे आयोजन करण्यात आले आहे. या मेळ्यात लहान मुलांसाठी विविध मनोरंजनात्मक खेळणी आहेत. गणेश आणि त्याचे वडील तेथे गेले होते. त्यावेळी गणेशने विद्युत पाळण्यात बसणार होता. तेथे असलेल्या जाळीत वीज प्रवाह उतराला होता. गणेशचा जाळीला स्पर्श झाला आणि विजेच्या झटक्याने तो कोसळला.

या घटनेनंतर घबराट उडाली. विद्युत पाळण्याचा वीज प्रवाह त्वरीत खंडीत करण्यात आला. बेशुुद्धावस्थेतील गणेशला तातडीने रुग्णालयात दाखल करण्यात आले. उपचारांपूर्वीच त्याचा मृत्यू झाला होता. दुर्घटनेस जबाबदार असल्याप्रकरणी संयोजक, तसेच विद्युत पाळण्याच्या मालकाविरुद्ध गुन्हा दाखल करण्यात आला आहे. सहायक पोलीस निरीक्षक विश्वास भाबड तपास करत आहेत.

पाळण्यात बसायला मिळणार म्हणून गणेशला मोठा आनंद झाला होता. वडिलांनी तिकीट काढल्यावर तो धावतच पाळण्याच्या दिशेने गेला. मात्र तेथे असलेल्या जाळीला हात लागताच तो विजेच्या धक्क्याने फेकला गेला. तो निपचीत पडल्याने त्याला रुग्णालयात दाखल करण्यात आले. मात्र तेथे मृतघोषीत केल्यावर वडिलांना मोठा धक्का बसला. काही वेळापुर्वीच आनंदाने उड्या मारणार मुलगा काहीच हालचाल कायमचा सोडून गेल्याचे लक्षात येताच त्यांनी हंबरडा फोडला. त्यांच्या घरावरही दुखाची सावट पसरले