Pune Crime : धायरी परिसरातील मुठा कालव्याशेजारी असलेल्या पिनाक आर्ट्स स्टुडिओच्या कला कार्यशाळेत चोरी करून धातूचे साहित्य तसेच मोटारसायकल चोरी करणाऱ्या सराईत गुन्हेगाराला नांदेडसिटी पोलिसांनी जेरबंद केले. आकाश बाळू ननावरे (वय ३२, रा. दत्तवाडी, पुणे) असे अटक करण्यात आलेल्या आरोपीचे नाव आहे. नांदेड सिटी पोलीस ठाण्याचे वरिष्ठ पोलीस निरीक्षक अतुल भोस यांनी याबाबत आरोपीचा तत्काळ शोध घेण्यासाठी स्वतंत्र तपास पथक नेमले होते.

सदर गुन्ह्याचा तपास सुरू असताना तपास पथकातील पोलिस उपनिरीक्षक दत्तात्रय सावंत, पोलिस अंमलदार निलेश कुलथे व शुभम उर्फ बंटी चव्हाण हे घटनास्थळी पाहणी करत होते. त्यावेळी मिळालेल्या गोपनीय माहितीनुसार, या गुन्ह्यातील आरोपी आकाश ननावरे हा रात्रीच्या वेळी संशयास्पदरीत्या फिरत असल्याची माहिती पोलिसांना मिळाली.

पोलिसांनी त्याचा शोध घेत दत्तवाडी परिसरातून त्याला ताब्यात घेतले. चौकशीदरम्यान त्याने गुन्ह्याची कबुली दिल्याचे पोलिसांनी सांगितले. आरोपीकडून चोरीस गेलेले धातूचे साहित्य तसेच विश्रामबाग पोलिस ठाण्यात दाखल असलेल्या गुन्ह्यातील चोरीची दुचाकी मोटारसायकल असा एकूण ४ लाख ७७ हजार ५०० रुपयांचा मुद्देमाल जप्त करण्यात आला आहे. आरोपीकडून दोन गुन्हे उघडकीस आणण्यात पोलिसांना यश आले आहे.

ही कारवाई नांदेड सिटी पोलीस ठाण्याचे वरिष्ठ पोलिस निरीक्षक अतुल भोस, पोलिस निरीक्षक (गुन्हे) प्रसाद राजत, पोलिस उपनिरीक्षक दत्तात्रय सावंत तसेच पोलिस अंमलदार निलेश कुलथे, शुभम चव्हाण, राजू बेगरे, प्रतीक भोरे, स्वप्निल मगर, मनोहर खराडे, सतीश खोत, निलेश बांधे, मोहन मिरगाळ, शिवाजी क्षीरसागर, संग्राम शिनगारे, भिमराज गांगुर्डे, उत्तम शिंदे, निलेश तनपुरे, अक्षय जाधव यांच्या पथकाने केली.