नवी दिल्ली – अलाहाबाद उच्च न्यायालयाने सांगितले की, अंतरिम आदेश येईपर्यंत भारतीय पुरातत्व विभागाच्या ज्ञानवापी मशिदीच्या सर्वेक्षणावरील स्थगिती कायम राहील. हा अंतरिम आदेश 3 ऑगस्टपर्यंत कायम राहणार आहे. याबाबत अलाहाबाद उच्च न्यायालय 3 ऑगस्ट रोजी निकाल देणार आहे.

भारतीय पुरातत्व सर्वेक्षण विभागाकडून वाराणसीच्या ज्ञानवापी मशीद संकुलाच्या सर्वेक्षणाच्या प्रकरणी गुरुवारी, मुख्य न्यायमूर्ती प्रितीनकर दिवाकर यांच्या अध्यक्षतेखाली तिसऱ्या दिवशी सुनावणी झाली. अलाहाबाद उच्च न्यायालयाने मशिदी परिसराच्या सर्वेक्षणाच्या वाराणसी जिल्हा न्यायालयाच्या आदेशाविरुद्ध अंजुमन मशीद समितीने दाखल केलेल्या याचिकेवर ही सुनावणी होती.

सुनावणीच्या सुरुवातीला भारतीय पुरातत्व सर्वेक्षण विभागाच्या अतिरिक्‍त संचालकांनी न्यायालयाला सांगितले की, एएसआय कोणत्याही भागाचे उत्खनन करणार नाही. सरन्यायाधीशांच्या प्रश्‍नाला ते उत्तर देत होते. सरन्यायाधीशांनी विचारले की उत्खनन म्हणजे काय? एएसआय अधिकाऱ्याने सांगितले की डेटिंग आणि पुरातत्व कृतींशी संबंधित कोणत्याही कार्यवाहीला उत्खनन म्हणतात; परंतु आम्ही स्मारकाचा कोणताही भाग खोदणार नाही.