Guy Parmelin : कृत्रिम बुद्धिमत्तेच्या जागतिक नियमनासाठी आणि संशोधनासाठी स्वित्झर्लंडने मोठी घोषणा (Guy Parmelin) केली आहे. २०२७ मध्ये जिनेव्हा येथे होणाऱ्या जागतिक एआय शिखर परिषदेचे यजमानपद स्वित्झर्लंड भूषवणार असून, २०२८ च्या परिषदेसाठी संयुक्त अरब अमिरातीसोबत (UAE) भागीदारी करणार असल्याचे स्विस अध्यक्ष गाय पार्मेलिन (Guy Parmelin) यांनी गुरुवारी जाहीर केले. नवी दिल्लीतील ‘एआय इम्पॅक्ट’ शिखर परिषदेत बोलताना पार्मेलिन म्हणाले की, या परिषदेमुळे स्वित्झर्लंडचे डिजिटल धोरणातील स्थान मजबूत होईल. एआयच्या विकासामध्ये आंतरराष्ट्रीय कायदा आणि मानवी हक्कांचे जतन करणे आवश्यक असून, जिनेव्हा शिखर परिषद यासाठी एक प्रभावी व्यासपीठ ठरेल. एआयमध्ये केवळ वेग नाही, तर आपल्या शिक्षण आणि आरोग्य व्यवस्थेला बदलण्याची क्षमता आहे. योग्य व्यवस्थापन केल्यास हे तंत्रज्ञान विषमता कमी करून सर्वांगीण समृद्धी आणू शकते, असे त्यांनी नमूद केले. अध्यक्ष गाय पार्मेलिन यांनी पंतप्रधान नरेंद्र मोदी यांच्याशी एआय, व्यापार आणि बहुपक्षीय सहकार्यावर सखोल चर्चा केली. विशेषतः ईएफटीए -भारत व्यापार करार (ज्यामध्ये स्वित्झर्लंड, आइसलँड, नॉर्वे आणि लिकटेंस्टाईन यांचा समावेश आहे) लागू झाल्यापासून दोन्ही देशांतील आर्थिक संबंधांना नवी गती मिळाली आहे. या करारानुसार पुढील १५ वर्षांत भारतात १०० अब्ज डॉलर्सची गुंतवणूक करण्याचे उद्दिष्ट असून नवीन द्विपक्षीय गुंतवणूक करारामुळे शाश्वत रोजगार निर्मितीला प्रोत्साहन मिळेल, असे ते म्हणाले. तसेच स्वित्झर्लंड आणि भारत हे दोन्ही देश नवोपक्रम आणि जबाबदारी यामध्ये संतुलन राखण्याचे समान मूल्य जोपासतात, असेही पार्मेलिन यांनी स्पष्ट केले.
