FDA Action : पुण्यात एफडीएची मोठी कारवाई; 1.13 कोटींचा गुटख्याचा साठा जप्त, 6 तास सुरू होता थरारक पाठलाग
FDA Action : पुणे जिल्ह्यात 1.13 कोटी रुपयांचा प्रतिबंधित गुटखा आणि पानमसाला जप्त करण्यात आला. चाकण पोलिस ठाण्यात गुन्हा दाखल असून आरोपींवर MCOCA अंतर्गत कारवाईची तपासणी सुरू आहे.
FDA Action : महाराष्ट्र अन्न व औषध प्रशासनाने (FDA) प्रतिबंधित गुटखा आणि पानमसाल्याचा तब्बल 1 कोटी 13 लाख 54 हजार 600 रुपयांचा साठा जप्त केला. या प्रकरणातील आरोपींवर महाराष्ट्र संघटित गुन्हेगारी नियंत्रण कायद्यानुसार (MCOCA) कारवाई करता येते का, याची तपासणी करण्याची मागणी पोलिसांकडे करण्यात आली आहे.
मध्य प्रदेशातून समृद्धी महामार्गाने भिवंडीच्या दिशेने येणारा ट्रक पुण्याकडे वळल्याची माहिती मिळाल्यानंतर FDAच्या पथकांनी त्याचा पाठलाग सुरू केला. राजगुरुनगर टोल नाक्यावर ट्रक थांबवण्याचा प्रयत्न झाला; मात्र चालकाने ट्रक न थांबवता पुढे नेला. सुमारे सहा तासांच्या पाठलागानंतर पोलिसांच्या मदतीने चाकण-तळेगाव चौकात ट्रक पकडण्यात आला.
तपासणीमध्ये प्रतिबंधित पानमसाला आणि सुगंधित तंबाखू आढळून आला. चालक नफीस मेहबूब खान, तसेच निलेश राठी, अरुण पाटील आणि संजय माता यांना ताब्यात घेण्यात आले. चाकण पोलिस ठाण्यात संबंधितांविरुद्ध गुन्हा दाखल करण्यात आला.
या प्रकरणात आरोपींचे पूर्वीचे गुन्हे, पुरवठा साखळी आणि आर्थिक व्यवहार तपासून MCOCA अंतर्गत कारवाईबाबत प्रस्ताव सादर करण्याची मागणी FDAने केली आहे.
