Gurnoor Brar 10 Wickets IND A vs SL A 2nd Unofficial Test Series Win : अफगाणिस्तानविरुद्धच्या एकदिवसीय मालिकेत आपल्या धारदार गोलंदाजीने पदार्पणातच सर्वांचे लक्ष वेधून घेणाऱ्या ६ फूट ५ इंच उंचीच्या गुरनूर ब्रार याने आता लाल चेंडूच्या क्रिकेटमध्येही (कसोटी) खळबळ उडवून दिली आहे. श्रीलंका दौऱ्यावर असलेल्या ‘इंडिया ए’ संघाकडून खेळताना गुरनूर ब्रारने दुसऱ्या अनाधिकृत कसोटी सामन्यात तब्बल १० विकेट्स घेण्याचा पराक्रम केला. त्याच्या या स्वप्नवत कामगिरीच्या जोरावर भारत ‘अ’ संघाने श्रीलंका ‘अ’ संघाचा धुव्वा उडवत सामना जिंकला. दोन्ही संघांतील पहिली कसोटी अनिर्णित राहिली होती, त्यामुळे या विजयासह भारताने ही मालिका १-० अशी आपल्या खिशात घातली आहे.

भारताने घोषित केला डाव; श्रीलंकेची ३ बाद ९ अशी दैना –

सामन्याच्या चौथ्या आणि अंतिम दिवशी भारतीय संघाने पहिल्या डावात ८ बाद ५४१ धावांवरून पुढे खेळायला सुरुवात केली. यश ठाकूर बाद झाल्यानंतर भारताने ९ बाद ५४३ धावांवर पहिला डाव घोषित केला. पहिल्या डावात ३६६ धावा करणाऱ्या श्रीलंकेविरुद्ध भारताने १७७ धावांची भक्कम आघाडी घेतली. दुसऱ्या डावात पिछाडी भरून काढण्यासाठी मैदानात उतरलेल्या यजमान श्रीलंका ‘अ’ संघाची गुरनूर ब्रारने दाणादाण उडवली. त्याने आपल्या सुरुवातीच्या षटकांमध्येच सोहन डी लिवेरा आणि नुवानिदू फर्नांडो यांना तंबूत धाडले. त्यानंतर आकिब नबीने पवनथा वीरासिंघेचा बळी घेत अवघ्या ४ षटकांत श्रीलंकेची अवस्था ३ बाद ९ अशी बिकट केली.

A 10-fer and his career-best first-class figures!

Gurnoor Brar ran through Sri Lanka A to set up a series win for India A ⚡ pic.twitter.com/VbKGwmXGJa

— Cricinfo (@cricinfo) July 5, 2026

गुरनूरच्या ६ विकेट्स; साई सुदर्शनने विजयाची औपचारिकता केली पूर्ण –

संकटात सापडलेल्या लंकन संघाकडून अशेन बंडाराने दुसऱ्या डावात ८७ धावांची झुंजार खेळी केली, मात्र त्यालाही गुरनूरनेच बाद केले. पहिल्या डावात ४ बळी घेणाऱ्या गुरनूर ब्रारने दुसऱ्या डावात ६ विकेट्स घेत श्रीलंकेचा दुसरा डाव २०९ धावांवर गुंडाळला. परिणामी, भारताला विजयासाठी अवघ्या ३३ धावांचे माफक लक्ष्य मिळाले. पहिल्या डावातील शतकवीर साई सुदर्शन आणि अमन मोखांडे यांनी अवघ्या ३८ चेंडूंत हे लक्ष्य गाठून भारताच्या ऐतिहासिक विजयावर शिक्कामोर्तब केले.

हेही वाचा – Prithvi Akriti Break Up : “माझ्यासोबत विश्वासघात झाला…!” मार्चमध्ये साखरपुडा केल्यानंतर जुलैमध्येच आकृती अग्रवालची पृथ्वी शॉबाबत खळबळजनक पोस्ट?

अफगाणिस्तानविरुद्धच्या वनडे मालिकेत ३ सामन्यांत ७ विकेट्स घेणाऱ्या गुरनूरने आता कसोटी संघासाठी आपली प्रबळ दावेदारी ठोकली आहे. पुढील महिन्यात होणाऱ्या श्रीलंकेविरुद्धच्या मुख्य कसोटी मालिकेत आणि त्यानंतरच्या न्यूझीलंड दौऱ्यासाठी वर्ल्ड टेस्ट चॅम्पियनशिपच्या (WTC) दृष्टीने गुरनूर ब्रारला भारतीय संघात संधी मिळणार का, याकडे सर्वांचे लक्ष लागले आहे.