Gurnoor Brar Sledging Daryl Mitchell Heated Spat Wellington ODI : भारत आणि न्यूझीलंड यांच्यातील दुसऱ्या एकदिवसीय सामन्यात भारताने डकवर्थ-लुईस (DLS) नियमानुसार ४ धावांनी निसटता विजय मिळवला. दोन्ही बाजूंच्या गोलंदाजांनी गाजवलेल्या या सामन्यात न्यूझीलंडकडून डॅरिल मिचेलने अर्धशतकी झुंज दिली. मात्र, पहिल्या डावादरम्यान भारताचा युवा वेगवान गोलंदाज गुरनूर ब्रार आणि डॅरिल मिचेल यांच्यात मैदानावर झालेली जोरदार वादावादी सर्वाधिक चर्चेचा विषय ठरली आहे. गुरनूरच्या आक्रमक स्लेजिंगला मिचेलनेही तोडीस तोड प्रत्युत्तर दिले असून, या हाय-व्होल्टेज वादाचा व्हिडीओ सध्या सोशल मीडियावर तुफान व्हायरल होत आहे.

‘तू फक्त ३ सामने खेळलास’ म्हणत डिवचले’; ३४ व्या षटकात पेटला वाद

हा संपूर्ण प्रकार न्यूझीलंडच्या डावातील ३३.४ व्या षटकात घडला. गुरनूर ब्रारने टाकलेला फुलर लेंथ चेंडू मिचेलने पॉइंटच्या दिशेने खेळून काढला. चेंडू टाकल्यानंतर गुरनूरने डोक्यावर हात ठेवत थेट मिचेलच्या दिशेने आक्रमक आगेकूच केली आणि काहीतरी शेरेबाजी केली. दोघांमधील हा संवाद अत्यंत तणावपूर्ण होता. यावेळी अनुभवी मिचेलने गुरनूरच्या नवखेपणावर बोट ठेवत, ‘तू आतापर्यंत फक्त तीनच सामने खेळला आहेस,’ असा खोचक टोमणा मारत त्याला डिवचण्याचा प्रयत्न केला. त्यानंतरही दोन्ही खेळाडू एकमेकांकडे पाहत सातत्याने वाद घालत राहिले.

पुढच्याच चेंडूवर टाळ्या वाजवत डिवचले; ‘वेल लेफ्ट’वरून पुन्हा बाचाबाची

Popcorn out, folks, the on-field drama is well and truly alive! 🍿

Watch the HERO VIDA India Tour of New Zealand, 2nd ODI, LIVE NOW on Sony Sports Network TV channels, Sony Vizha & Sony LIV.

#SonySportsNetwork #SonyVizha #SonyLIV #NZvIND https://t.co/tmA73M8W3v

— Sony Sports Network (@SonySportsNetwk) November 7, 2026

या वादानंतर पुढच्याच चेंडूवर गुरनूरने ऑफ स्टम्पच्या बाहेर उसळता चेंडू टाकला, जो मिचेलने शांतपणे सोडून दिला. मात्र, गुरनूर इथेच थांबला नाही. तो पुन्हा मिचेलच्या अगदी जवळ पोहोचला आणि त्याने उपहासात्मक टाळ्या वाजवत ‘वेल लेफ्ट’ (छान सोडलास!) अशी शेरेबाजी केली. मिचेलनेही त्याला पुन्हा सडेतोड उत्तर दिले, ज्यामुळे मैदानावरील वातावरण काही क्षणांसाठी चांगलेच तापले होते. अखेर पंचांच्या मध्यस्थीनंतर हा वाद शांत झाला आणि पुढच्या चेंडूवर मिचेलने एक धाव घेतली.

१० षटकांत अवघ्या ३० धावांत ४ विकेट्स; सामनावीर गुरनूरचा भेदक मारा

Gurnoor Brar is the new Siraj 😂🔥

– He challenged Daryl Mitchell to play shots against his bowling.

– But Daryl refused to take the bait and didn’t play any bog shot against Gurnoor.

– However, he tried to go big against Axar Patel and ended up getting caught out.

– And just look at Gurnoor’s celebration right in front of Daryl Mitchell! 🤣

— Mukku (@Cric_Mukku) November 7, 2026

मैदानावरील या आक्रमकतेचा सकारात्मक परिणाम गुरनूरच्या गोलंदाजीत स्पष्टपणे दिसून आला. पंजाबच्या या युवा गोलंदाजाने वेलिंग्टनच्या खेळपट्टीवरून मिळणाऱ्या वेगाचा आणि अतिरिक्त उसळीचा अचूक फायदा उठवला. त्याने आपल्या १० षटकांच्या स्पेलमध्ये अवघ्या ३० धावा खर्च करत ४ महत्त्वपूर्ण विकेट्स घेतल्या. पहिल्या सामन्यात अर्शदीप सिंगने ४ विकेट्स घेतल्या होत्या. त्यानंतर या मालिकेत चार विकेट्स घेणारा गुरनूर हा दुसरा भारतीय गोलंदाज ठरला. त्याच्या या भेदक माऱ्यामुळे त्याला ‘सामनावीर’ पुरस्काराने गौरवण्यात आले.

हेही वाचा – Virat Kohli Record : विराट कोहलीचा विश्वविक्रम; रिकी पॉन्टिंगला मागे टाकत न्यूझीलंडविरुद्ध रचला इतिहास, बनला जगातील नंबर १ फलंदाज

मालिकेत सर्वाधिक ७ विकेट्स; अव्वल स्थानावर झेप –

गुरनूर ब्रारने या एकदिवसीय मालिकेत आपल्या अचूक टप्प्याने सर्वांचे लक्ष वेधून घेतले आहे. पहिल्या सामन्यात ३ आणि दुसऱ्या सामन्यात ४ अशा एकूण ७ विकेट्स घेत तो या मालिकेत सर्वाधिक विकेट्स घेणाऱ्या गोलंदाजांच्या यादीत अव्वल स्थानी पोहोचला आहे. अवघ्या काही सामन्यांचा अनुभव पाठीशी असतानाही दिग्गज फलंदाजांवर दबाव निर्माण करण्याची त्याची हिंमत भारतीय संघासाठी जमेची बाजू ठरत आहे.