Election 2024 | Gunratna Sadavarte | Aditya Thackeray : वरळी हा दक्षिण मुंबईतील महत्वाचा मतदारसंघ आहे. उच्चभ्रू, मध्यमवर्गीय यांच्याबरोबरीने चाळवस्ती असा संमिश्र भाग या मतदारसंघात येतो. काही दिवसांपूर्वी मनसेचे अध्यक्ष राज ठाकरे यांनी मुख्यमंत्री एकनाथ शिंदे यांची भेट घेऊन वरळी येथील समस्यांवर चर्चा केली होती.

आगामी विधानसभा निवडणुकीमध्ये वरळी मतदार संघात उद्धव ठाकरे गटाचे नेते आदित्य ठाकरे यांच्यासमोर मनसेच्या संदीप देशपांडे यांचे आव्हान असणार असल्याचे बोलले जात आहे.

सन 2019 साली झालेल्या विधानसभा निवडणुकीत आदित्य ठाकरे यांनी वरळी विधानसभा मतदारसंघातून निवडणूक लढविली होती. उद्धव ठाकरे यांचे पुत्र आलेल्या आदित्य यांची ही पहिलीच निवडणूक होती. या निवडणुकीत 89248 मतं मिळवत आदित्य ठाकरेंनी मोठा विजय मिळवला होता.

दरम्यान, आता वरळी मतदार संघातून आदित्य ठाकरेंविरोधात आणखी एका व्यक्तीने शड्डू ठोकलाय. आणि ते नाव म्हणजे वकील ‘गुणरत्न सदावर्ते’. होय, वरळी विधानसभा मतदारसंघातून निवडणूक लढवणार असल्याची माहिती त्यांनी स्वत: दिली आहे. शिवाय महायुतीतील शिवसेना आणि भाजपकडून उमेदवारी मिळण्यासाठी सदावर्ते यांनी पक्षश्रेष्ठींकडे मागणी केली.

सध्या वरळी विधानसभा मतदारसंघात आदित्य ठाकरे आमदार आहेत. मनसे कडून संदीप देशपांडे हे देखील मैदानात उतरणार आहेत. त्यातच वरळी विधानसभेमध्ये आता गुणरत्न सदावर्ते हे लढणार असल्याने वरळी विधानसभा मतदारसंघ चर्चेत आला आहे.

महाविकास आघाडी लोकसभेप्रमाणे विधानसभेलाही एकत्रच निवडणुक लढवणार आहे. अजून जागावाटप निश्चित झाले नसले तरी, सर्व पक्ष आपआपली संभाव्य यादी तयार करत आहे. शिवसेनेनेही यादी तयारी केल्याची माहिती समोर येत आहे. कोणा कोणाचा या यादीत समावेश आहे हे जाणून घेऊया.

दरम्यान, मुंबईत विधानसभेच्या 36 जागा आहेत. यापैकी 14 जागा ठाकरेंनी जिंकल्या होत्या. शिवसेनेने मागील निवडणुकीत एकूण 56 जागांवर विजय मिळवला होता. मात्र आता पक्ष फुटीनंतर आमदार हे एकनाथ शिंदे आणि उद्धव ठाकरे यांच्या शिवसेनेत विभागले गेले आहेत.