Donald Trump: अमेरिकेचे राष्ट्राध्यक्ष डोनाल्ड ट्रम्प व्हाइट हाउसमध्ये परतल्यानंतर निर्णयांचा धडाका लावला आहे. सत्तेत आल्यानंतर पहिल्याच भाषणात ट्रम्प यांनी मेक्सिकोच्या आखाताचे नाव बदलून ‘अमेरिकेचे आखात’ करणार असल्याचे म्हटले होते. आता अधिकृतरित्या याची घोषणा करण्यात आली आहे. ट्रम्प यांनी निवडणुकीपूर्वी देखील हे आश्वासन दिले होते. आता त्यांनी मेक्सिको आखाताचे नाव अधिकृतरित्या बदलले आहे. ही राष्ट्राच्या इतिहासातील आणि अर्थव्यवस्थेतील सर्वात महत्वाची संपत्ती असल्याचेही प्रशासनाने म्हटले आहे.

ट्रम्प प्रशासनाकडून मेक्सिको आखाताच्या नावासोबतच अलास्कामधील सर्वात उंच पर्वत शिखर असलेल्या डेनालीचे नाव देखील बदलण्याचा निर्णय घेण्यात आला आहे. यापुढे आता उत्तर अमेरिकेतील सर्वात उंच पर्वत शिखर असलेल्या डेनालीचे नाव ‘माउंट मॅकिनले’ असणार आहे. अमेरिकेच्या माजी राष्ट्रपतींचे नाव या शिखरला देण्यात आले आहे.

याआधी उत्तर अमेरिकेतील सर्वात उंच पर्वत शिखरला अमेरिकेचे माजी राष्ट्रपती विलियम मॅकिनले यांच्या नावावरून माउंट मॅकिनले म्हणून ओळखले जात असे. मात्र, 1975 मध्ये नाव बदलून डेनाली असे करण्यात आले. आता ट्रम्प यांनी सत्तेत आल्यानंतर पुन्हा एकदा पर्वत शिखरचे नाव बदलून ‘मॅकिनले’ करण्याचा निर्णय घेतला आहे. ट्रम्प यांनी उद्घाटन भाषणामध्येही याची घोषणा केली होती.

दरम्यान, ट्रम्प यांनी सत्तेत आल्यानंतर मेक्सिकोच्या सीमेवर आणीबाणी लावण्याची घोषणा केली होती. सरकारकडून याची अंमलबजावणी देखील सुरू झाली आहे. अमेरिकेने मेक्सिकोमधून होणारी बेकायदेशीर घुसखोरी रोखण्यासाठी सीमेवर 1500 सैनिक तैनात केले आहेत. तसेच, ताब्यात घेतलेल्या बेकायदेशीर स्थलांतरिताना परत पाठवण्यात येणार आहे.