राजगुरुनगर – घरातील त्रासाला कंटाळून आत्महत्या करण्याच्या उद्देशाने उच्च दाब असलेल्या विद्युत खांबावर चढून नंतर खाली उडी मारून आत्महत्या करण्याचा प्रयत्न एका परप्रांतीय कामगाराने निमगाव जवळील सेझ परिसरात केला. आनंद रजवार वय २२ असे या तरुणाचे नाव आहे. या टनेबाबत सविस्तर माहिती अशी की, निमगाव (ता खेड ) येथे खेड सिटीत एक बावीस वर्षीय परप्रांतीय तरुण घरातील मानसिक ताण आल्यामुळे आत्महत्या करण्याच्या उद्देशाने उच्च दाब असलेल्या विजेच्या खांबावर चढून आत्महत्या करण्याचा प्रयत्न केला. मंगळवारी (दि. ६) दुपारी बारा वाजण्याच्या सुमारास ही घडली. अमुल डेअरीच्या परिसरातील विद्युत वाहक सुमारे दोन तास तो उच्च दाब असलेल्या विजेच्या खांबावर बसून होता. तो ज्यावेळी खांबावर गेला, त्यावेळी विद्युत प्रवाह सुरू होता. स्थानिक नागरिकांच्या लक्षात हा प्रकार आल्यानंतर तात्काळ वीज वितरण कंपनी आणि पोलिसाना लढविण्यात आले. वीज खांबावरील विद्युत प्रवाह बंद करण्यात आला. मात्र तब्बल २ तास त्याने प्रशासनाला वेठीस धरले होते. या तरुणाला खाली ये अशी विनवणी पोलीस व नागरिक करत होते. मात्र तो खाली येत नव्हता. तुम्ही जर वरती चढून आले तर मी उडी टाकीन अशी धमकी देत होता. पोलीस हवालदार मोहन अवघडे यांच्यासह स्थानिक नागरिकांनी त्यांचा जीव वाचवण्यासाठी पोलखाली जाळी धरुन ठेवली होती. मात्र तो खाली येत नसल्याने पोलिस आणि स्थानिकांनी विद्युत खांबावर चढण्याचा प्रयत्न केला. तरुणाने आत्महत्येच्या उद्देशाने पोल वरून खाली उडी मारली. तो नागरिकांनी खाली पकडलेल्या जाळीत पडल्यामुळे त्याचा जीव वाचला. त्याच्या या शोले स्टाईल आंदोलनामुळे नागरिकांचा जीव टांगणीला लागला होता.
