नवी दिल्ली : जगातील अनेक देशांमध्ये लसीकरणाला सुरुवात झालेली असतानाच ब्रिटनमध्ये करोनाचा एक नवीन प्रकार आढळून आला आहे. त्यासाठी जगभरातील देशांनी खबरदारीचे उपाय राबवण्यास सुरुवात केली आहे. दरम्यान, देशातही यासाठी पावले उचलण्याची मागणी करण्यात येत आहे. या नव्या प्रकारामुळे च्या पार्श्वभूमीवर केंद्रीय आरोग्य मंत्री हर्षवर्धन यांनी, ‘सरकार सर्तक असून चिंता करण्याची आवश्यकता नाही’ असे म्हटले आहे.

भारतातही काही नेत्यांनी आंतरराष्ट्रीय विमान सेवा बंद करण्याची मागणी केली आहे. या नव्या स्ट्रेनमुळे जगाच्याबरोबरीने भारताची देखील चिंता वाढवली आहे. कारण आधीच करोना व्हायरसमुळे मोठे नुकसान झाले आहे. त्यामुळे देशासमोर दुसरे आव्हान उभस राहणार असल्याचे बोलले जात आहे.

The government is alert. There is no need to panic: Union Health Minister Dr Harsh Vardhan on the discovery of the new strain of coronavirus in UK pic.twitter.com/BnV09c0cbQ

— ANI (@ANI) December 21, 2020

दरम्यान ब्रिटनमधील हा करोनाचा नवीन प्रकार जगभरात धुमाकूळ घालणाऱ्या आधीच्या करोना पेक्षा जास्त धोकादायक असल्याचे म्हटले जात आहे. या नव्या प्रकाराची लागण होण्याची शक्यता अधिक आहे. हा नवीन प्रकार नियंत्रणाबाहेर असल्याचे ब्रिटनने म्हटले आहे.

त्यामुळे तिथे लॉकडाउन अधिक कडक करण्यात आला आहे. या नव्या प्रकारच्या धोक्यामुळे जगातील अनेक देशांनी आंतरराष्ट्रीय विमान सेवा आणि ब्रिटनहून येणाऱ्या प्रवाशांना प्रवेशबंदी केली आहे. सौदी अरेबिया, कॅनडा या देशांनी आंतरराष्ट्रीय विमान सेवा बंद करण्याचा निर्णय घेतलाय. नेदरलँड आणि बेल्जिअमनं ब्रिटनमध्ये जाणाऱ्या आपल्या विमानसेवा तात्पुरत्या स्थगित केल्या आहेत. इटलीदेखील विमानसेवा तात्पुरत्या स्वरूपात स्थगित करण्याच्या विचारात आहे.