Jharkhand HIV cases : झारखंडच्या पश्चिम सिंहभूम जिल्ह्यातील चाईबासा येथील सदर रुग्णालयात वैद्यकीय निष्काळजीपणाचा भयावह प्रकार समोर आला आहे. थॅलेसेमियाग्रस्त पाच अल्पवयीन मुलांना रक्तसंक्रमणादरम्यान दूषित रक्त दिल्यामुळे त्यांना HIV ची लागण झाल्याचे नुकतेच उघड झाले. या घटनेमुळे आरोग्य विभागात खळबळ उडाली असून, झारखंड उच्च न्यायालयाने स्वतःहून दखल घेतली आहे.

राज्य सरकारने तात्काळ उच्चस्तरीय चौकशीचे आदेश दिले असून, तीन अधिकाऱ्यांना निलंबित केले आहे. मुख्यमंत्री हेमंत सोरेन यांनी प्रत्येक बाधित कुटुंबाला २ लाख रुपयांची मदत आणि मुलांना मोफत उपचाराची घोषणा केली आहे.

१३ सप्टेंबर २०२५ रोजी सात वर्षीय थॅलेसेमिया रुग्णाला रक्तसंक्रमण देण्यात आले तेव्हा घटनेची सुरुवात झाली. १८ ऑक्टोबर रोजी केलेल्या पुढील तपासणीत हे मूल HIV पॉझिटिव्ह आढळले. मुलाच्या वडिलांनी रुग्णालयाच्या रक्तपेढीतील तंत्रज्ञावर निष्काळजीपणाचा आरोप करत तक्रार दाखल केली. यानंतर माध्यमांद्वारे बातमी प्रसिद्ध झाल्यावर झारखंड उच्च न्यायालयाने स्वतःहून संज्ञान घेतले आणि आरोग्य विभागाला अहवाल सादर करण्याचे निर्देश दिले.

घटनेचे गांभीर्य ओळखून झारखंड राज्य एड्स नियंत्रण सोसायटी (JSACS) आणि आरोग्य सेवा संचालक डॉ. दिनेश कुमार यांच्या नेतृत्वाखालील पाच सदस्यीय वैद्यकीय पथकाने २५ ऑक्टोबर रोजी चाईबासा येथे धाव घेतली. रुग्णालयातील रक्तपेढी आणि बाल रुग्णसेवा विभागाची तपासणी केल्यानंतर आणखी चार मुले HIV पॉझिटिव्ह आढळली. यामुळे बाधित मुलांची संख्या पाच झाली. ही सर्व मुले थॅलेसेमिया रुग्ण असल्याने दर १५ ते ३० दिवसांनी रक्तसंक्रमणाची गरज भासत होती आणि त्यांना अनेक वर्षांपासून उपचार चालू होते.

वेगवेगळ्या रक्तदात्यांकडून संसर्गाची शक्यता

जिल्हा उपायुक्त चंदन कुमार यांच्या माहितीनुसार, नुकत्याच किटद्वारे केलेल्या तपासणीत ही प्रकरणे समोर आली, जी यापूर्वी तपासली गेलेली नव्हती. प्रशासनाने रक्तदात्यांचा डेटा तपासणे आणि HIV पॉझिटिव्ह रक्तामुळे संसर्ग झाला का याची पडताळणी सुरू केली आहे. विशेष बाब म्हणजे, या पाचही मुलांचे रक्तगट वेगवेगळे असल्याने, संसर्ग एकाच रक्तदात्यापासून नव्हे, तर वेगवेगळ्या दात्यांकडून झाला असावा असा प्राथमिक अंदाज आहे.