मुंबई : राज्यातल्या सत्तास्थापणेचा पेच काही केल्या सुटत नसल्याचे दिसत आहे. शिवसेना, कॉंग्रेस आणि राष्ट्रवादी कॉंग्रेस या तीन पक्षांचं सरकार येणार का? हा प्रश्न ही कायम आहे. अशात 17 नोव्हेंबरला सरकार स्थापन होईल अशी चर्चा राजकीय वर्तुळात होती. मात्र 17 नोव्हेंबरला सरकार स्थापन होणे अवघड आहे असं शरद पवार यांनी म्हटलं आहे. सरकार स्थापनेसाठी वेळ लागेल असं वक्तव्य राष्ट्रवादीचे अध्यक्ष शरद पवार यांनी केलं आहे.

कॉंग्रेसचे कार्यकारी प्रदेशाध्यक्ष डॉ. नितीन राऊत यांच्या घरी सदिच्छा भेटीदरम्यान चर्चेदरम्यान शरद पवार यांनी हे वक्तव्य केले. विदर्भाचा दौरा करुन शरद पवार यांनी शेतकऱ्यांची विचारपूस केली. त्यानंतर नितीन राऊत यांच्या घरी भेट दिल्यानंतर शरद पवार यांनी 17 नोव्हेंबर रोजी सत्ता स्थापन होणे अवघड असल्याचे म्हटले आहे.

17 नोव्हेंबरला बाळासाहेब ठाकरे यांची पुण्यतिथी असते. त्याच दिवशी शिवसेनेचा मुख्यमंत्री शपथ घेईल असे संकेत दिले जात होते. मात्र शरद पवार यांनी ही शक्‍यता नाकारली आहे. नितीन राऊत यांच्या घरी ज्येष्ठ आंबेडकरी विचारवंत भाऊ लोखंडे हे उपस्थित होते. यावेळी 17 नोव्हेंबरला महाराष्ट्राचा इतिहास बदलून द्या, अशी इच्छा लोखंडे यांनी शरद पवारांकडे बोलून दाखवली. मात्र 17 तारखेला अवघड आहे अजून भरपूर वेळ लागेल असे उत्तर शरद पवार यांनी दिलं. बाळासाहेब ठाकरे यांच्या पुण्यतिथीच्या दिवशी म्हणजेच 17 नोव्हेंबरला नवे सरकार स्थापन होईल अशी शक्‍यता वर्तवण्यात येत होती. मात्र या चर्चांना शरद पवार यांच्या वक्तव्यामुळे पूर्णविराम मिळाला आहे.