Small Savings Schemes : सरकारने मंगळवारी पीपीएफ आणि एनएससी सह विविध अल्पबचत योजनांवरील व्याजदर 1 जुलै 2026 पासून सुरू होणार्‍या सलग नवव्या तिमाहीसाठी अपरिवर्तित ठेवले आहेत.

अर्थ मंत्रालयाने एका अधिसूचनेत म्हटले आहे की, आर्थिक वर्ष 2026-27 च्या दुसर्‍या तिमाहीसाठी, जी 1 जुलै 2026 पासून सुरू होऊन 30 सप्टेंबर 2026 रोजी संपेल, विविध अल्पबचत योजनांवरील व्याजदर हे आर्थिक वर्ष 2026-27 च्या पहिल्या तिमाहीसाठी (1 मार्च 2026 ते 30 जून 2026) अधिसूचित केलेल्या दरांप्रमाणेच अपरिवर्तित राहतील.

अधिसूचनेनुसार, सुकन्या समृद्धी योजनेअंतर्गत ठेवींवर 8.2 टक्के व्याजदर लागू होईल, तर तीन वर्षांच्या मुदत ठेवीवरील दर चालू तिमाहीत 7.1 टक्के कायम राहील. लोकप्रिय सार्वजनिक भविष्य निधी (पीपीएफ) आणि पोस्ट ऑफिस बचत ठेव योजनांचे व्याजदर अनुक्रमे 7.1 टक्के आणि 4 टक्के कायम ठेवण्यात आले आहेत.

किसान विकास पत्रावरील व्याजदर 7.5 टक्के असेल आणि या गुंतवणुकीची मुदत 115 महिन्यांत पूर्ण होईल. राष्ट्रीय बचत प्रमाणपत्रावरील (एनएससी) व्याजदर जुलै-सप्टेंबर तिमाहीसाठी 7.7 टक्के राहील. चालू तिमाहीप्रमाणेच, मासिक उत्पन्न योजनेवर दुसर्‍या तिमाहीतही गुंतवणूकदारांना 7.4 टक्के परतावा मिळेल.

यामुळे, प्रामुख्याने पोस्ट ऑफिस आणि बँकांद्वारे चालवल्या जाणार्‍या लहान बचत योजनांचे व्याजदर सलग नवव्या तिमाहीसाठी अपरिवर्तित ठेवण्यात आले आहेत. सरकारने शेवटचा बदल 2023-24 च्या चौथ्या तिमाहीत काही योजनांच्या व्याजदरात केला होता.