Yashshree Munde : दिवंगत मा. मंत्री गोपीनाथ मुंडे यांच्या तिसऱ्या लेकीचीही राजकारणात एन्ट्री झाली आहे. मुंडेंच्या दोन्ही मुली पंकजा मुंडे आणि प्रितम मुंडे या सक्रिय राजकारणात आहेत. महायुती सरकारमध्ये पंकजा मुंडे या मंत्री आहेत, तर प्रितम मुंडे या दोनवेळा बीड लोकसभा मतदारसंघाच्या खासदार राहिलेल्या आहेत. आता त्यांची तिसरी लेक यशश्री मुंडे यांनी वैद्यनाथ बँकेच्या निवडणुकीसाठी आपला उमेदवारी अर्ज दाखल केला आहे.

दि वैद्यनाथ अर्बन को-ऑप. बँक लि. परळी वैजनाथ बँकेच्या संचालक मंडळाची निवडणूक पार पडणार आहे. १७ जागांसाठी ही निवडणूक होत असून शुक्रवारी ११ जुलै रोजी उमेदवारी अर्ज दाखल करण्याचा शेवटचा दिवस होता. या दिवशी यशश्री मुंडे यांनी आपला उमेदवारी अर्ज दाखल केला आहे. वैद्यनाथ बँकेच्या १७ जागांसाठी ७१ जणांनी उमेदवारी अर्ज दाखल केले आहेत.

१४ जुलै या दिवशी प्राप्त झालेल्या उमेदवारी अर्जांची छाननी होणार असून १५ ते १९ जुलैदरम्यान अर्जमाघारी घेता येणार आहे. दि. १० अॅागस्ट रोजी सकाळी ८ ते सायंकाळी ४ वाजेपर्यंत यावेळेत मतदान प्रक्रिया पार पडेल. १२ अॅागस्ट या दिवशी मतमोजणी होऊन निकाल जाहीर होणार आहे. विशेष म्हणजे या निवडणुकीसाठी माजी खासदार डॅा. प्रितम मुंडे यांनीदेखील आपला अर्ज दाखल केलेला आहे.

अध्यक्षपदाची जबाबदारी कुणाकडे ?

माजी खासदार डॉ. प्रीतम मुंडे आणि सुरेखा मेनकुदळे यांनी पंकजा मुंडे गटातून अर्ज दाखल केले आहेत. यामुळे या दोन्ही जागा बिनविरोध निवडून येण्याचा मार्ग मोकळा झाला आहे. यशश्री मुंडे यांनीही अर्ज दाखल केल्याने बँकेच्या अध्यक्षपदाची जबाबदारी कुणाकडे जाणार हे पाहणे महत्वाचे असणार आहे.

वैद्यनाथ बँक निवडणुकीत खुल्या प्रवर्गासाठी १२ जागा आहेत. तर अनुसूचित जाती १, ओबीसी १, भटक्या विमुक्त व विशेष मागास प्रवर्ग १, महिला प्रतिनिधी २ जागा अशी आरक्षणाची रचना आहे.

हेही वाचा : Crime News : शिरूर तालुक्यातील आंबळे दरोडा प्रकरणातील दोन अट्टल गुन्हेगार गजाआड; ६ गुन्ह्यांची कबुली