Gokul Election : गोकुळ दूध संघाच्या अध्यक्षपदाच्या निवडीवरून कोल्हापूरमधील राजकीय वातावरण चांगलंच तापलं आहे. अध्यक्षपदावर महायुतीचाच संचालक विराजमान होईल, असा ठाम विश्वास मंत्री हसन मुश्रीफ यांनी व्यक्त केला आहे. “अध्यक्षपदाचा बहुमान परमेश्वराने आम्हाला दिला आहे,” असं म्हणत त्यांनी काँग्रेस नेते सतेज पाटील यांच्यावर निशाणा साधला. (Gokul Election)

सतेज पाटील यांच्या गटाला महायुतीपेक्षा केवळ एक जागा अधिक मिळाली. मात्र, निकालानंतर त्यांनी विजयाचा उन्माद केला, असा आरोप मुश्रीफ यांनी केला. त्यांना अध्यक्ष करण्यासाठी आम्ही मदत का करावी? त्यांनी स्वतः कोरम पूर्ण करून अध्यक्ष निवडावा, असं आव्हानही त्यांनी दिलं. (Gokul Election)

‘सतेज पाटलांनी निकालानंतर उन्माद केला’

गोकुळच्या निवडणुकीत महायुतीचे १२, तर महाविकास आघाडीचे १३ संचालक निवडून आले आहेत. अध्यक्ष निवडीसाठी आवश्यक कोरम १४ चा होता. मात्र, सतेज पाटील यांना हा कोरम मान्य नव्हता आणि अध्यक्ष निवडीसाठी महायुतीच्या १२ संचालकांनी उपस्थित राहावं, असा त्यांचा आग्रह होता, असं मुश्रीफ म्हणाले. (Gokul Election)

सतेज पाटील यांच्याकडे समन्वयाचा अभाव असल्याची टीका करत त्यांनी निवडणुकीनंतर महायुतीशी संपर्क साधण्याचा किंवा चर्चा करण्याचा प्रयत्न केला नसल्याचंही सांगितलं. (Gokul Election)

‘मोर्चा गोकुळसाठी नव्हे, काँग्रेस प्रदेशाध्यक्षपदासाठी’

सतेज पाटील यांनी कोल्हापुरात काढलेला संघर्षमोर्चा गोकुळच्या प्रश्नासाठी नव्हता, तर हर्षवर्धन पाटील यांना दूर करून काँग्रेसचं प्रदेशाध्यक्षपद मिळवण्यासाठी होता, असा आरोपही हसन मुश्रीफ यांनी केला. (Gokul Election)

गोकुळच्या अध्यक्षपदाच्या निवडीतील वैधानिक अडचणी दूर करण्यासाठी सरकार प्रयत्न करत असल्याचं त्यांनी सांगितलं. दोन्ही गटांनी एकत्र बसून चर्चा करावी आणि मार्ग काढावा, अशी सूचना मुख्यमंत्र्यांनी केली होती. अध्यक्षपदाबाबत सामंजस्याने तोडगा काढता आला असता, मात्र सतेज पाटील यांनी त्यासाठी पुढाकार घेतला नाही, असं मुश्रीफ म्हणाले. (Gokul Election)

महायुतीच्या बैठकीत अध्यक्षपदाचा उमेदवार ठरणार

“बहुमत मिळूनही परमेश्वराने त्यांना अध्यक्षपदाचा बहुमान दिला नाही; तो बहुमान आम्हाला दिला आहे. साडेपाच लाख दूध उत्पादकांना न्याय देण्याचं काम आम्ही करू,” असं मुश्रीफ यांनी म्हटलं. (Gokul Election)

उद्या सकाळी महायुतीची बैठक होणार असून, त्यामध्ये एकमताने अध्यक्षपदासाठी उमेदवाराचं नाव निश्चित केलं जाईल, अशी माहिती त्यांनी दिली. तसेच शासननियुक्त चार तज्ज्ञ संचालकांची नावेही उद्या समोर येतील. हे तज्ज्ञ असून कोणत्याही पक्षाचे कार्यकर्ते नाहीत, असा दावाही त्यांनी केला. (Gokul Election)

गोकुळच्या अध्यक्षपदाची निवडणूक १० नोव्हेंबर रोजी होणार असून, न्यायालयाच्या आदेशानुसार शासननियुक्त चार संचालकांची मते स्वतंत्र ठेवली जाणार आहेत. त्यामुळे अध्यक्षपदाच्या निवडीकडे आता संपूर्ण राज्याचं लक्ष लागलं आहे. (Gokul Election)