मुख्यमंत्री एकनाथ शिंदे यांच्या हस्ते आषाढी एकादषीनिमित्त पंढरपूरच्या विठुरायाची शासकीय पूजा पार पडली. यावेळी त्यांनी विठुरायाकडे ”आपलं राज्य सुजलाम सुफलाम होऊ दे, चांगला पाऊस पडू दे, राज्यातील प्रत्येक माणसाला चांगले दिवस येऊ देत” असे साकडे घातले आहे.

दरम्यान, एकादशीच्या पूर्वसंध्येला मुख्यमंत्र्यांनी पंढरपुरात आयोजित ‘कृषी पंढरी’ या कृषी प्रदर्शनाचं उद्घाटन केलं. यावेळी त्यांनी विद्यार्थ्यांसाठीही खास योजनेची घोषणा केली. मुख्यमंत्र्यांनी या योजनेंतर्गत १२ वी उत्तीर्ण विद्यार्थ्यांना दरमहा सहा हजार रुपये, डिप्लोमा केलेल्या विद्यार्थ्यांना आठ हजार रुपये आणि पदवीधर तरुणांना १० हजार रुपये स्टायपंड देण्याची मोठी घोषणा केली.

यावरून आता ठाकरे गटाचे नेते संजय राऊत यांनी शिंदे सरकारला घेरले आहे. संजय राऊत म्हणाले,’  सरकारवर ८ लाख कोटींच कर्ज आहे. ही काही छोटी-मोठी रक्कम नाहीये. लोकसभा निवडणूक हरल्यानंतर या सरकारने नव्या नव्या यजना आणल्या. लाडकी बहीण ही योजना तर मध्य प्रदेशच्या योजनेची कॉपी आहे. आता लाडका भाऊ आणली आहे. लाडक्या भावांना ६ हजार आणि १० हजार रुपये देणार, आणि लाडक्या बहिणीला फक्त 1500 रुपये ? लाडक्या बहिणीला पण १० हजार रुपये द्या, तरच त्याचं घर चालेल. 1500 रुपयांमध्ये लाडक्या बहिणीचं घर चालणार कसं? असा प्रश्नही त्यांनी उपस्थित केला आहे.

संजय राऊत पुढे म्हणाले,’खरी गरज लाडक्या बहिणींना आहे. त्या घर चालवतात. अनेकींच्या घरात नवरा,भाऊ बेरोजगार, नोकऱ्या नाहीत. आज एअर इंडियाच्या कार्यालयासमोर 2000 लोडरच्या जागा भरण्यासाठी 25000 सुशिक्षित तरुणांची झुंबड उडाली या महाराष्ट्राची स्थिती आहे, हे सगळे लाडके भाऊ आहे. त्यांनाही दहा- दहा हजार रुपये द्या आणि लाडक्या बहिणीच्या खात्यात सुद्धा दहा हजार रुपये टाका पंधराशे रुपयांनी काय होतं, पंधराशे रुपयात मुख्यमंत्र्यांचे घर चालेल का ? असा सवाल राऊत यांनी विचारला.

सरकारच्या यपजनेबाबत बोलतांना राऊत पुढे म्हणाले,’लाडक्या बहिणीवर अन्याय का करता ? आमची भूमिका आहे. लाडक्या बहिणीलाही दहा हजार रुपये द्या, लाडक्या भावाला ही दहा हजार रुपये द्या आणि स्त्री पुरुष समानता महाराष्ट्रात आहे, हे दाखवून द्या, असं राऊत म्हणाले.