Girija Oak Shahrukh Khan: बॉलिवूडचा बादशाह शाहरुख खान केवळ प्रेक्षकांचाच नाही, तर अनेक कलाकारांचाही लाडका आहे. त्याच्यासोबत काम केलेले कलाकार अनेकदा त्याच्या स्वभावाबद्दल आणि अनुभवांबद्दल मोकळेपणाने बोलताना दिसतात. अभिनेत्री गिरिजा ओक हिनेसुद्धा अलीकडेच शाहरुखसोबत काम करतानाचा एक खास अनुभव शेअर केला आहे. गिरिजा ओकने 2023 मध्ये प्रदर्शित झालेल्या ‘जवान’ या चित्रपटात शाहरुख खानसोबत काम केलं होतं. एका मुलाखतीत तिने सांगितलं की, जवळपास दोन वर्षं ती शाहरुखसोबत शूटिंग करत होती. याच काळात आर्यन खानचं ड्रग्ज प्रकरण सुरू झालं होतं आणि तो काळ शाहरुखसाठी अत्यंत कठीण होता. गिरिजा म्हणाली, “आम्ही सेटवर अनेकदा भेटायचो. एकदा मी माझ्या सहअभिनेत्रीसोबत बोलत होते की, कामाच्या व्यापामुळे मुलाला भेटता येत नाही. ते ऐकून शाहरुख स्वतःच्या मुलांबद्दल बोलू लागला. तो म्हणाला की, सकाळी मी घरी जातो तेव्हा मुलं झोपलेली असतात आणि बाहेर पडतो तेव्हा शाळेत गेलेली असतात. मला सुहानालाही नीट भेटता येत नाही, आर्यन त्याच्या कामात व्यस्त आहे.” गिरिजानं सांगितलं की, शाहरुख इतक्या मनमोकळ्या गप्पा मारतील असं तिला वाटलंच नव्हतं. आर्यन खान प्रकरणाचा काळ आर्यन खानची केस सुरू असताना शाहरुख खान कशा अवस्थेत होता, याबद्दल गिरिजा म्हणाली, “मी आर्यन केस सुरू झाली तेव्हा शाहरुखसोबत शूटिंग करत होते. त्याआधी लता मंगेशकर यांच्या अंत्यसंस्कारावेळीही त्याच्यावर टीका झाली होती; पण मी त्याला कधीही अस्वस्थ किंवा चिडलेला पाहिलं नाही. तो आयुष्यातील अतिशय कठीण काळातून जात होता, तरीही त्यानं आपलं काम अत्यंत प्रामाणिकपणे केलं.” ती पुढे म्हणाली, “जेव्हा ३-४ महिने आर्यन खानची केस सुरू होती, तेव्हा शाहरुख एकाही सार्वजनिक कार्यक्रमात दिसला नाही. तो ‘जवान’चं शूटिंगही करत नव्हता. त्या काळात तो कोणाच्याही संपर्कात नव्हता. आम्ही त्याला पुन्हा तेव्हाच भेटलो, जेव्हा ‘जवान’चं शूटिंग सुरू झालं आणि तोपर्यंत ती केस संपली होती. तेव्हा तो पुन्हा पूर्वीसारखाच शांत आणि स्थिर दिसत होता.”
