Maharashtra Assembly Elections 2024 – राज्‍यात विधानसभा निवडणुकीचे लवकरच बिगुल येत्या वाजणार असून राजकीय पक्ष आतापासूनच तयारीला लागले आहेत. लोकसभा निवडणुकीनंतर महाविकास आघाडीचा उत्साह दुणावला आहे तर, महायुती नव्याने कामाला लागली आहे. या प्रमुख पक्षांच्या रणधुमाळीत वंचित बहुजन आघाडी, प्रहार जनशक्ती पार्टीसह अन्य चार पक्षांना निवडणूक आयोगाकडून चिन्हांचे वाटप करण्यात आले आहे.

विधानसभा निवडणुकीपूर्वी नोंदणीकृत बिगर-मान्यताप्राप्त पक्षांना निवडणूक चिन्ह बहाल केले आहे. नोंदणीकृत मान्यताप्राप्त पक्षांना दिलेल्या कायमस्वरुपी चिन्हांव्यतिरिक्त काही चिन्हे निवडणूक आयोगाने राखून ठेवलेली असतात. हीच चिन्हे निवडणूक आयोगाकडून अपक्ष उमेदवारांबरोबरच नोंदणीकृत बिगर-मान्यताप्राप्त पक्षांना त्या-त्या निवडणुकीपुरते बहाल केली जातात.

नुकत्याच झालेल्या लोकसभा निवडणुकीत ॲड. प्रकाश आंबेडकर यांच्या वंचित बहुजन आघाडीला निवडणूक आयोगाने प्रेशर कुकर हे चिन्ह दिले होते. तर बच्चू कडू यांच्या प्रहार जनशक्ती पार्टीला शिट्टी हे चिन्ह देण्यात आले होते.

आता येत्या एक-दोन महिन्यांत महाराष्ट्र विधानसभेची निवडणूक जाहीर होण्याची शक्यता आहे. त्यादृष्टीने केंद्रीय निवडणूक आयोगाने वंचित बहुजन आघाडीला ‘गॅस सिलिंडर’, तर प्रहार जनशक्ती पार्टीला ‘बॅट’ हे निवडणूक चिन्ह देण्यात आले आहे.

याशिवाय, जातिया जन सेना पार्टीला (महाराष्ट्रासह झारखंड) फ्लॉवर आणि भारत आदिवासी पार्टीला (महाराष्ट्रासह झारखंड) हॉकी आणि बॉल हे चिन्ह देण्यात आले आहे.

शरद पवार गटाला दिलासा
लोकसभा निवडणुकीत राष्ट्रवादी काँग्रेस शरदचंद्र पवार पक्षाने 10 जागा लढवल्या आणि त्यापैकी आठ जागा जिंकल्या. असे असले तरी अपक्ष उमेदवारांना देण्यात आलेल्या ‘पिपाणी’ या निवडणूक चिन्हाचा परिणाम शरद पवार गटाच्‍या उमेदवारांच्या मतांवर पडला.

त्यामुळे चिन्हांच्या यादीतून ‘पिपाणी’ काढून टाकावी, अशी मागणी शरद पवार गटाने केंद्रीय निवडणूक आयोगाकडे केली होती. त्याला सकारात्मक प्रतिसाद देत निवडणूक आयोगाने हे चिन्ह गोठवले आहे.